მისია Artemis II ფლორიდაში მდებარე კენედის სახელობის კოსმოსური ცენტრიდან წარმატებით გაეშვა, ხოლო „კოსმოსური გაშვების სისტემის“ (SLS) რაკეტამ ეკიპაჟი უსაფრთხოდ გაიყვანა ორბიტაზე. კოსმოსური ხომალდი Orion, დედამიწაზე დაბრუნებამდე, მთვარის გარშემო 10-დღიან მოგზაურობას განახორციელებს.
ეკიპაჟის შემადგენლობაშია სამი ამერიკელი და ერთი კანადელი ასტრონავტი. მისიის მიზანია იმ კრიტიკული სისტემების გამოცდა, რომლებიც აუცილებელია მომავალში კოსმოსის სიღრმეების ადამიანის მონაწილეობით გამოსაკვლევად. როგორც NASA-ს პირდაპირ ეთერში აღინიშნა, დედამიწის ორბიტაზე გასული ასტრონავტები, მთვარის გარშემო ტურის დაწყებამდე, რამდენიმე დღის განმავლობაში სხვადასხვა ტესტს ჩაატარებენ.
დაბრუნება მთვარეზე
ეს მისია აღნიშნავს პირველ პილოტირებულ ფრენას დედამიწის ბუნებრივი თანამგზავრის - მთვარის გარშემო ბოლო 50-ზე მეტი წლის განმავლობაში. NASA-მ განაცხადა, რომ ეს მისია მნიშვნელოვანი ეტაპია პროგრამა „არტემისში“ (Artemis), რომლის მიზანია ამ ათწლეულის ბოლომდე ადამიანების კვლავ დაბრუნება მთვარეზე და კოსმოსის სიღრმეების კვლევის მხარდაჭერა.
მისია ასევე განიხილება როგორც მნიშვნელოვანი ნაბიჯი მთვარეზე ადამიანის მუდმივი ყოფნის უზრუნველსაყოფად, რაც საერთაშორისო პარტნიორებთან ერთად მთვარის ბაზის შექმნასაც გულისხმობს.
თუმცა, ძირითადი სისტემები, განსაკუთრებით მთვარეზე დასაჯდომი მოდული, ჯერ კიდევ შემუშავების პროცესშია. NASA მუშაობს კონტრაქტორ კომპანიებთან - SpaceX-თან და Blue Origin-თან, რათა დააჩქაროს მათი პროგრესი. ოფიციალური პირები გეგმავენ ერთი ან ორივე დასაჯდომი მოდულის გამოცდას დედამიწის ორბიტაზე მთვარეზე დაჯდომის მცდელობამდე. მომავალ წელს კიდევ ერთი დამატებითი სატესტო მისიაა დაგეგმილი.
