ევროკავშირის ლიდერები მიესალმნენ საფრანგეთის გადაწყვეტილებას, როგორც მშვიდობისთვის გადადგმულ სასიცოცხლო ნაბიჯს, ხოლო ისრაელმა ევროპის წამყვანი სახელმწიფოს ეს გადაწყვეტილება მკაცრად დაგმო.

საფრანგეთის პრეზიდენტმა, ემანუელ მაკრონმა განაცხადა, რომ საფრანგეთი სექტემბერში, გაერთიანებული ერების ორგანიზაციის გენერალურ ასამბლეაზე, პალესტინის სახელმწიფოს ოფიციალურად აღიარებს. ამ ნაბიჯით საფრანგეთი ყველაზე გავლენიანი ევროპული ქვეყანა გახდება, რომელმაც მსგავსი გადაწყვეტილება მიიღო.

მაკრონმა სოციალურ ქსელში გაკეთებულ განცხადებაში აღნიშნა: „საფრანგეთმა საბოლოოდ უნდა ააშენოს პალესტინის სახელმწიფო, უზრუნველყოს მისი არსებობა, დათანხმდეს მის განიარაღებას და სრულად აღიაროს ისრაელი, რითაც წვლილს შეიტანს ახლო აღმოსავლეთში ყველას უსაფრთხოებაში.“

ამ ნაბიჯით საფრანგეთი შეუერთდა იმ ქვეყნების სიას, რომლებმაც 2023 წლის ოქტომბერში ისრაელის მიერ ღაზაში დაწყებული ოპერაციის შემდეგ პალესტინის სახელმწიფო აღიარეს ან აღიარების მზადყოფნა გამოთქვეს. პალესტინის, როგორც სახელმწიფოს, აღიარებას ამ დროისთვის სულ მცირე 142 ქვეყანა უჭერს მხარს.

აზრთა სხვადასხვაობა ისრაელსა და ევროპაში

საფრანგეთის მიერ პალესტინის აღიარების გადაწყვეტილებამ ისრაელის აღშფოთება გამოიწვია. ისრაელის პრემიერ-მინისტრმა, ბენიამინ ნეთანიაჰუმ, საფრანგეთის ადმინისტრაციის ნაბიჯს „ტერორისთვის ჯილდო“ უწოდა. ნეთანიაჰუმ გააფრთხილა, რომ ამ გადაწყვეტილებას „ისეთივე ახალი ირანული მარიონეტული სტრუქტურის შექმნის რისკი“ ახლავს, როგორიც ღაზა გახდა. ნეთანიაჰუმ თავის განცხადებაში თქვა: „მოდით, გულახდილად ვთქვათ: პალესტინელებს ისრაელის გვერდით სახელმწიფო კი არ სურთ, არამედ ისრაელის ნაცვლად სურთ სახელმწიფო.“

მეორე მხრივ, ევროპელი ლიდერები ამ გადაწყვეტილებას მიესალმნენ. ირლანდიის პრემიერ-მინისტრმა, საიმონ ჰარისმა, გადაწყვეტილებას „ორი სახელმწიფოს პრინციპზე დაფუძნებული გადაწყვეტის განხორციელებაში შეტანილი მნიშვნელოვანი წვლილი“ უწოდა. ესპანეთის პრემიერ-მინისტრმა, პედრო სანჩესმა, კი განაცხადა: „ჩვენ ერთად უნდა დავიცვათ ის, რის განადგურებასაც ნეთანიაჰუ ცდილობს. ორი სახელმწიფოს პრინციპზე დაფუძნებული გადაწყვეტა ერთადერთი გამოსავალია.“ შოტლანდიის პირველმა მინისტრმა, ჯონ სუინიმ, გაერთიანებულ სამეფოს მოუწოდა, საფრანგეთის მაგალითს მიბაძოს და ხაზგასმით აღნიშნა, რომ პალესტინის სახელმწიფოს აღიარება „მშვიდობისთვის სასიცოცხლოდ მნიშვნელოვანია.“

ჰუმანიტარული კრიზისი ზეწოლას ზრდის

მაკრონის განცხადება იმ დროს გაკეთდა, როდესაც ღაზაში არსებული ჰუმანიტარული კატასტროფის გამო საერთაშორისო შეშფოთება სულ უფრო იზრდება. ღაზის ჯანდაცვის სამინისტროს მონაცემებით, 2023 წლის ოქტომბრიდან დღემდე 59 500-ზე მეტი პალესტინელი დაიღუპა, რომელთა უმეტესობა ქალი და ბავშვია.

ჯანდაცვის მსოფლიო ორგანიზაციამ ისრაელის მიერ დაწესებული ბლოკადა „ადამიანის ხელით შექმნილი“ შიმშილობის მიზეზად დაასახელა. მაკრონმაც გაიზიარა ეს შეშფოთება და განაცხადა: „დღეს სასწრაფო პრიორიტეტია ღაზაში ომის დასრულება და სამოქალაქო მოსახლეობის გადარჩენა.“

გასული წლის ნოემბერში სისხლის სამართლის საერთაშორისო სასამართლომ ისრაელის პრემიერ-მინისტრ ბენიამინ ნეთანიაჰუსა და თავდაცვის ყოფილ მინისტრ იოავ გალანტის წინააღმდეგ ომის დანაშაულებისა და კაცობრიობის წინააღმდეგ ჩადენილი დანაშაულების ბრალდებით დაკავების ორდერები გასცა. ისრაელი ასევე მართლმსაჯულების საერთაშორისო სასამართლოში გენოციდის საქმესთან დაკავშირებით წარდგა.