სამხრეთკორეულმა თავდაცვის გიგანტმა Hanwha Aerospace Co.-მ, მას შემდეგ რაც გასულ კვირას ნორვეგიასთან შორ მანძილზე მოქმედი ზალპური ცეცხლის რეაქტიული სისტემების მიწოდებაზე შეთანხმებას მიაღწია, ორშაბათს განაცხადა, რომ გეგმავს ნორდიკულ რეგიონში თავისი როლის გაფართოებას, როგორც უსაფრთხოების გრძელვადიანი პარტნიორი.

საინფორმაციო სააგენტო Yonhap-ის ცნობით, კომპანიის პრეზიდენტმა და გენერალურმა დირექტორმა სონ ჯე-ილმა აღნიშნა, რომ ნორვეგიის მიერ Hanwha Aerospace-ის Chunmoo-ს ტიპის სისტემების შერჩევა ასახავს იმ ნდობას, რომელიც მანამდე მიწოდებული K9 თვითმავალი ჰაუბიცების მეშვეობით ჩამოყალიბდა.

„ჩვენ მზად ვართ, ნორვეგიასთან მჭიდრო თანამშრომლობით წვლილი შევიტანოთ ნორდიკული რეგიონის გრძელვადიან უსაფრთხოებაში და კიდევ უფრო განვავითაროთ ჩვენი როლი, როგორც სტრატეგიულმა პარტნიორმა უსაფრთხოების სფეროში“, - დასძინა სონმა. ნორვეგიის თავდაცვის მატერიალური უზრუნველყოფის სააგენტოსთან (NDMA) გაფორმებული ხელშეკრულების ფარგლებში, Hanwha Aerospace ნორვეგიის შეიარაღებულ ძალებს მიაწვდის 16 ერთეულ Chunmoo MLRS სისტემას, მაღალი სიზუსტის მართვადი რაკეტების პაკეტსა და ინტეგრირებულ ლოგისტიკურ მხარდაჭერას.

დაახლოებით 2 მილიარდი დოლარის ღირებულების ეს შეთანხმება არის გაგრძელება Hanwha Aerospace-სა და ნორვეგიის არმიას შორის თითქმის ათწლიანი თანამშრომლობისა, რომლის ფარგლებშიც, 2017 წლიდან მოყოლებული, ნორვეგიამ შეიძინა 52 ერთეული K9 Vidar თვითმავალი ჰაუბიცა და 14 ერთეული K10 საბრძოლო მასალის გადამზიდი მანქანა.

კომპანია ასევე გეგმავს ნორვეგიულ ინდუსტრიასთან თანამშრომლობის გაძლიერებას ერთობლივი განვითარებისა და ადგილობრივი გამოცდების გზით.