აშშ-მა დაჟინებით აღნიშნა, რომ უკრაინის შესახებ წინადადება ნამდვილად აშშ-ის ოფიციალურ პოლიტიკას წარმოადგენს და უარყო სენატორთა ჯგუფის ბრალდებები იმის თაობაზე, თითქოს სახელმწიფო მდივანმა მარკო რუბიომ თქვა, რომ განხილული დოკუმენტი მხოლოდ რუსების „სურვილების სიაა“.

უთანხმოებამ 28-პუნქტიანი გეგმის გარშემო, რომელიც ითვალისწინებს მოსკოვის მიერ დიდი ხნის განმავლობაში მოთხოვნილი უკრაინის ტერიტორიების გადაცემას, ომის დასრულების მცდელობებში უდიდესი დაბნეულობა გამოიწვია.

პრეზიდენტი დონალდ ტრამპი ცდილობდა 28-პუნქტიანი გეგმის თავს მოხვევას და უკრაინელებზე ზეწოლას ახდენდა, რომ ეს დოკუმენტი რამდენიმე დღეში მიეღოთ. მომლაპარაკებლები კვირას შვეიცარიაში შეიკრიბებიან.

თუმცა, მას შემდეგ, რაც გაჩნდა მწვავე კრიტიკა, რომ წინადადება თითქმის მთლიანად მოსკოვის სასარგებლოდ არის შედგენილი, ზოგიერთმა ამერიკელმა სენატორმა შაბათს ნოვა-სკოტიაში (კანადა), ჰალიფაქსის უსაფრთხოების ფორუმზე პრესკონფერენცია გამართა და თავისი მოსაზრებები გამოთქვა.

სენატორებმა - რესპუბლიკელმა მაიკ რაუნდსმა, დამოუკიდებელმა ანგუს კინგმა და დემოკრატმა ჯინ შაჰინმა - განაცხადეს, რომ რუბიომ მათ უთხრა: უკრაინის არსებული წინადადება არ არის აშშ-ის ოფიციალური პოზიცია, არამედ ის „რუსების სურვილების სიას“ წარმოაჩენს.

ტრამპის დიპლომატიურ წარმომადგენელზე, სტივ ვიტკოფზე მითითებით, რაუნდსმა თქვა: „მან გვითხრა, რომ ეს არ იყო ამერიკული წინადადება. ეს არის წინადადება, რომელიც მიღებულია იმ პირისგან, ვინც ამ წინადადებაში რუსებს წარმოადგენს. ის ბატონ ვიტკოფს გადაეცა. ეს არ არის ჩვენი რეკომენდაცია. ეს არ არის ჩვენი სამშვიდობო გეგმა“.

კინგმა დაადასტურა ეს კომენტარები და გაჟონილ 28-პუნქტიან გეგმაზე თქვა: „ეს არსებითად არის რუსების სურვილების სია, რომელიც ახლა ევროპელებსა და უკრაინელებს წარედგინათ“.

სახელმწიფო დეპარტამენტის პასუხი

სახელმწიფო დეპარტამენტის პრესსპიკერმა ტომი პიგოტმა უარყო ეს ბრალდებები და X-ზე გააზიარა პოსტი კინგის კომენტარების ციტირებით: „ეს სრულიად მცდარია. როგორც მდივანი რუბიო და მთელი ადმინისტრაცია მუდმივად ხაზს უსვამს, ეს გეგმა მომზადდა შეერთებული შტატების მიერ, როგორც რუსების, ისე უკრაინელების წვლილის გათვალისწინებით“.

აშშ-ის სახელმწიფო მდივანმა მარკო რუბიომ კი X-ზე გამოქვეყნებულ განცხადებაში დაჟინებით აღნიშნა, რომ წინადადება აშშ-ის მიერ მომზადდა და მოიცავს როგორც უკრაინის, ისე რუსეთის წვლილს.

რუბიომ განაცხადა: „სამშვიდობო წინადადება აშშ-ის მიერ მომზადდა. ის წარმოდგენილია როგორც ძლიერი ჩარჩო მიმდინარე მოლაპარაკებებისთვის. ის ეყრდნობა რუსული მხარის მიერ მოწოდებულ ინფორმაციას, მაგრამ ამავე დროს ეყრდნობა უკრაინის მხრიდან წინარე და მიმდინარე წვლილსაც“.

ამასობაში, რუბიო უკრაინის სამშვიდობო გეგმის შესახებ მოლაპარაკებებისთვის აშშ-დან ჟენევაში გაემგზავრა.

შაჰინმა თქვა, რომ მან და რაუნდსმა რუბიოსთან ერთობლივი შეხვედრა გამართეს, როდესაც აშშ-ის უმაღლესი რანგის დიპლომატი ჟენევაში უკრაინელ მაღალჩინოსნებთან მოლაპარაკებების ბოლო რაუნდისთვის მიემგზავრებოდა.

რაუნდსმა თქვა, რომ მან და მისმა კოლეგებმა რუბიოსთან შეხვედრა გეგმის შესახებ არსებული შეშფოთების გამო მოითხოვეს.

მან აღნიშნა, რომ შეხვედრაზე რუბიო „ამ საკითხთან დაკავშირებით ძალიან პირდაპირი იყო“.

რაუნდსმა თქვა: „ეს არ ჰგავს იმას, რაც ჩვეულებრივ ჩვენი მთავრობიდან გამოდის, განსაკუთრებით დაწერის მანერით. თავდაპირველად ის უფრო ისე გამოიყურებოდა, თითქოს რუსულად იყო დაწერილი“.

კინგმა ყურადღება გაამახვილა იმაზე, რომ გეგმამ მოსკოვი არ უნდა დააჯილდოოს და განაცხადა: „ყველას სურს ამ ომის დასრულება, მაგრამ ჩვენ გვინდა, რომ ის დასრულდეს სამართლიანი მშვიდობით, რომელიც პატივს სცემს უკრაინის ტერიტორიულ მთლიანობასა და სუვერენიტეტს, არ აჯილდოებს აგრესიას და უზრუნველყოფს უსაფრთხოების საკმარის გარანტიებს“.