ვიზიტის ფარგლებში გამართულ შეხვედრებზე მინისტრი ფიდანი ხაზს გაუსვამს თურქეთსა და სამხრეთ კორეას შორის სტრატეგიული პარტნიორობის შემდგომი გაღრმავების საერთო ნებას.

ფიდანი განიხილავს იმ ერთობლივ ნაბიჯებს, რომლებიც შეიძლება გადაიდგას სამხრეთ კორეასთან - აზია-წყნარი ოკეანის რეგიონში თურქეთის სიდიდით მეორე სავაჭრო პარტნიორთან - ეკონომიკური და სავაჭრო კავშირების კიდევ უფრო გასაძლიერებლად. იგი ხაზს გაუსვამს ორმხრივი ინვესტიციების გაღრმავებისა და თავისუფალი ვაჭრობის შეთანხმების განახლებისა და უფრო ყოვლისმომცველ დოკუმენტად ქცევის სურვილს.

შეხვედრებზე ფიდანი შეეხება უკრაინის, სირიისა და პალესტინის აღდგენის პროცესებში შესაძლო თანამშრომლობას, ასევე ცენტრალურ აზიასა და აფრიკაში ერთობლივი პროექტების განხორციელების შესაძლებლობებს.

მინისტრი შეაფასებს პარტნიორობისა და საინვესტიციო შესაძლებლობებს ბირთვული და განახლებადი ენერგიის სფეროებში. ასევე, განიხილავს ერთობლივ წამოწყებებს ისეთ სტრატეგიულ სექტორებში, როგორიცაა ხელოვნური ინტელექტი, ნახევარგამტარული ტექნოლოგიები, ინოვაციური (გარღვევის მომტანი) ტექნოლოგიები, ბიოტექნოლოგია, ახალი თაობის ბატარეების სისტემები და სატრანსპორტო ინფრასტრუქტურა.

ტანკ „ალთაის“ პროექტის წარმატებულ მაგალითზე დაყრდნობით, ფიდანი თავდაცვის ინდუსტრიაში არსებულ თანამშრომლობის პოტენციალს შეაფასებს და ყურადღებას გაამახვილებს უპილოტო საფრენ აპარატებზე, შეიარაღებულ უპილოტო საფრენ აპარატებზე და სხვა შესაძლო ერთობლივ პროექტებზე.

ორმხრივი ურთიერთობები

თურქეთსა და სამხრეთ კორეას შორის დიპლომატიური ურთიერთობები 1957 წელს დამყარდა, ხოლო 2012 წელს „სტრატეგიული პარტნიორობის“ დონემდე ამაღლდა. 2025 წელს ორ ქვეყანას შორის სავაჭრო ბრუნვამ 11,3 მილიარდი დოლარი შეადგინა.

სამხრეთ კორეის მთლიანმა პირდაპირმა ინვესტიციებმა თურქეთში 3,5 მილიარდ დოლარს გადააჭარბა, ხოლო წლიური პირდაპირი ინვესტიციები 400 მილიონი დოლარის ფარგლებშია. თურქეთში სამხრეთ კორეული კაპიტალის მქონე 430-ზე მეტი კომპანია საქმიანობს.

პრეზიდენტი რეჯეფ თაიფ ერდოღანი სამხრეთ კორეას ბოლოს 2018 წლის 2-3 მაისს ეწვია. სამხრეთ კორეის პრეზიდენტი ლი ჯე მიუნგი კი თურქეთს ოფიციალური ვიზიტით 2025 წლის 24-25 ნოემბერს სტუმრობდა.