ევროკავშირმა, ისრაელის თავდაცვის მინისტრის, ისრაელ კაცისა და ეროვნული უსაფრთხოების მინისტრის, ითამარ ბენ გვირის მიერ პალესტინელების გადასახლებასთან დაკავშირებით გაკეთებული განცხადებების შემდეგ, აღნიშნა: „ჩვენ უარვყოფთ ყველა მცდელობას ღაზის სექტორში დემოგრაფიული ან ტერიტორიული თვალსაზრისით რაიმე ცვლილების განხორციელების შესახებ“.
ევროკომისიის ერთ-ერთმა პრესსპიკერმა, კრისტიან ვიგანდმა, ყოველდღიურ პრესკონფერენციაზე უპასუხა სააგენტო „ანადოლუს“ (AA) კორესპონდენტის შეკითხვებს კაცისა და ბენ გვირის განცხადებების შესახებ, რომლებიც აშკარად გამოხატავდნენ ღაზაში ეთნიკური წმენდისა და იძულებითი გადასახლების განზრახვას.
ვიგანდმა ხაზგასმით აღნიშნა, რომ ყველა მხარემ ძალისხმევა უნდა მიმართოს დაძაბულობის შემცირებისკენ და არა მისი გაღვივებისკენ.
გაეროს უშიშროების საბჭოს 2735-ე რეზოლუციაზე მითითებით, ვიგანდმა ხაზი გაუსვა: „ჩვენ უარვყოფთ ყველა მცდელობას ღაზის სექტორში დემოგრაფიული ან ტერიტორიული ცვლილებების შესატანად“.
ვიგანდმა აღნიშნა, რომ ღაზის სექტორი, დასავლეთ სანაპიროსა და პალესტინელებთან ერთად, უნდა იყოს მომავალი პალესტინის სახელმწიფოს ნაწილი, როგორც ერთიანი და მთლიანი სუბიექტი.
მან ასევე დასძინა, რომ იძულებით გადასახლებაზე საუბარიც კი დაუშვებელია და განაცხადა: „ღაზა პალესტინელების მომავალი სახელმწიფოს განუყოფელი ნაწილია“.
მანამდე ისრაელის ეროვნული უსაფრთხოების მინისტრმა, ითამარ ბენ გვირმა განაცხადა, რომ შემუშავებულია გეგმა, რომელიც ითვალისწინებს 1 მილიონ 860 ათასი პალესტინელის იძულებით გაძევებას ღაზის სექტორიდან 7 წლის ვადაში.
ისრაელის თავდაცვის მინისტრმა, ისრაელ კაცმა კი აღნიშნა, რომ პალესტინელების ღაზის სექტორიდან დეპორტაციის გეგმა „არ გაუქმებულა“, თუმცა ამ ეტაპზე შეჩერებულია.
„საბოლოო ჯამში, ღაზასთვის რეალური გამოსავალი არ არსებობს. მიგრაციის სამსახური მზად არის განახორციელოს ეს ზღვიდან, ჰაერიდან და ყველა სხვა გზით“, - განაცხადა კაცმა და იქვე აღნიშნა, რომ ეგვიპტე, რომელსაც ღაზასთან სახმელეთო საზღვარი აქვს, კატეგორიულად ეწინააღმდეგება პალესტინელების დეპორტაციას.
