უკრაინამ რუსეთის ბალტიის ზღვის პრიმორსკის პორტსა და ნავთობგადამამუშავებელ ქარხანას დაარტყა

რუსეთის ხელისუფლებამ განაცხადა, რომ უკრაინის მიერ განხორციელებული უპილოტო საფრენი აპარატების თავდასხმების შემდეგ ბალტიის ზღვის პრიმორსკის პორტში საწვავის გაჟონვა მოხდა, ხოლო NORSI-ს ნავთობგადამამუშავებელ ქარხანაში ხანძარი გაჩნდა.

გავრცელებული ინფორმაციით, ბოლო ერთი თვის განმავლობაში უკრაინამ რუსეთის ენერგეტიკულ ინფრასტრუქტურაზე თავდასხმები გაახშირა.

ლენინგრადის ოლქის გუბერნატორმა ალექსანდრე დროზდენკომ პირველ განცხადებაში თქვა, რომ პრიმორსკში მილსადენი დაზიანდა, თუმცა მოგვიანებით Telegram-ით გავრცელებულ პოსტში აღნიშნა, რომ მილსადენი არ დაზიანებულა და პორტის ტერიტორიაზე მდებარე საწვავის რეზერვუარიდან გაჟონვა ნამსხვრევების მოხვედრის შედეგად მოხდა.

გავრცელებული ინფორმაციით, პრიმორსკმა, რომლის სიმძლავრე დღეში დაახლოებით 1 მილიონი ბარელია და რუსეთის ერთ-ერთი უმსხვილესი საექსპორტო პუნქტია, გასულ თვეში უკრაინული თავდასხმების შედეგად შენახვის სიმძლავრის მინიმუმ 40 პროცენტი დაკარგა.

იმავე პერიოდში აღინიშნა, რომ თავდასხმების, უკრაინაში „დრუჟბას“ მილსადენის ჩაკეტვისა და რუსეთთან დაკავშირებული ტანკერების დაყადაღების გამო, რუსეთის ნავთობის საექსპორტო სიმძლავრის დაახლოებით 40 პროცენტი მწყობრიდან გამოვიდა.

ქარხანაში ხანძარი გაჩნდა

კიდევ ერთი თავდასხმისას ხანძარი გაჩნდა NORSI-ს ნავთობგადამამუშავებელ ქარხანაში, რომელიც ქვეყნის დასავლეთით, ნიჟნი ნოვგოროდის ოლქში მდებარეობს. ნიჟნი ნოვგოროდის ოლქის გუბერნატორმა გლებ ნიკიტინმა კვირას განაცხადა, რომ უკრაინული დრონების თავდასხმის შემდეგ NORSI-ში, რომელიც ქვეყნის მეოთხე უდიდესი ნავთობგადამამუშავებელი ქარხანაა, ხანძარი გაჩნდა და ობიექტზე ორი დანადგარი დაზიანდა.

ნიკიტინმა აღნიშნა, რომ თავდასხმის შედეგად დაზიანდა ელექტროსადგური და რამდენიმე საცხოვრებელი სახლი, წინასწარი ინფორმაციით კი მსხვერპლი არ არის.

აღინიშნა, რომ NORSI-ს ქარხანას, რომელიც რუსეთის ბენზინის მეორე უმსხვილესი მწარმოებელია, წლიურად 16 მილიონი ტონის, ანუ დღეში დაახლოებით 320 ათასი ბარელის გადამუშავების სიმძლავრე აქვს.

ნოვოროსიისკის მერმა ანდრეი კრავჩენკომ ასევე განაცხადა, რომ ქალაქზე დრონების თავდასხმის საფრთხის გამო საჰაერო განგაში გამოცხადდა.

აღინიშნა, რომ ასეთი განგაშის დროს ნავთობის ჩატვირთვა, მათ შორის იმ ტერმინალზე, საიდანაც კასპიის მილსადენის კონსორციუმის მეშვეობით ყაზახური ნავთობის ტრანსპორტირება ხდება, ჩვეულებრივ წყდება.