ნატო-ს პრესსპიკერმა განაცხადა, რომ ალიანსის წევრები ერთობლივად იმუშავებენ არქტიკის უსაფრთხოების უზრუნველსაყოფად.

ოთხშაბათს გაკეთებულ განცხადებაში სპიკერმა აღნიშნა: „ნატო-ს მოკავშირეებს შორის მოლაპარაკებები იმ ჩარჩოზე, რომელსაც პრეზიდენტმა გაუსვა ხაზი, ფოკუსირებული იქნება არქტიკის უსაფრთხოების უზრუნველყოფაზე ყველა მოკავშირის, პირველ რიგში კი არქტიკის რეგიონის შვიდი წევრის კოლექტიური ძალისხმევით“. მან ასევე დასძინა: „მოლაპარაკებები დანიას, გრენლანდიასა და ამერიკის შეერთებულ შტატებს შორის გაგრძელდება იმ მიზნით, რომ რუსეთმა და ჩინეთმა ვერასოდეს მოიპოვონ გავლენა გრენლანდიაში, როგორც ეკონომიკური, ისე სამხედრო თვალსაზრისით“.

კვირების განმავლობაში გაგრძელებული მწვავე რიტორიკის შემდეგ, რაც ბოლო ათწლეულების განმავლობაში ტრანსატლანტიკურ ურთიერთობებში ყველაზე ღრმა განხეთქილების რისკს შეიცავდა, აშშ-ის პრეზიდენტმა დონალდ ტრამპმა მოულოდნელად უკან დაიხია საბაჟო ტარიფებით მუქარისგან, რომელსაც იგი გრენლანდიის საკითხზე „კოზირად“ იყენებდა და განაცხადა, რომ დავის დასასრულებლად კომპრომისი ახლოსაა.

დავოსში ნატო-ს გენერალურ მდივანთან, მარკ რუტესთან შეხვედრის შემდეგ, ტრამპმა სოციალურ ქსელ Truth Social-ში დაწერა: „ამ ურთიერთგაგების საფუძველზე, მე არ ავამოქმედებ საბაჟო ტარიფებს, რომლებიც 1 თებერვლიდან უნდა შესულიყო ძალაში“.“