თურქეთის ოფიციალურმა პირებმა განაცხადეს, რომ ნატოს ჰაერსაწინააღმდეგო თავდაცვის სისტემებმა ირანიდან ნასროლი და თურქეთისკენ მომავალი ბალისტიკური რაკეტა გააუვნებელყვეს. ეს უკვე მეორე შემთხვევაა ბოლო ერთი კვირის განმავლობაში, როდესაც ირანული რაკეტები თურქეთის საჰაერო სივრცეში იჭრება.
თურქეთის ეროვნული თავდაცვის სამინისტროს ორშაბათის განცხადების თანახმად, რაკეტა აღმოსავლეთ ხმელთაშუაზღვისპირეთის თავზე იქნა აღმოჩენილი და მოკავშირეთა საჰაერო და სარაკეტო თავდაცვის სისტემების მიერ ჩამოგდებული.
რაკეტის ნამსხვრევები თურქეთის სამხრეთ-აღმოსავლეთით, გაზიანთეფის პროვინციის შაჰინბეის რაიონში ჩამოვარდა. ოფიციალური პირების ცნობით, შემთხვევას მსხვერპლი ან დაშავებულები არ მოჰყოლია.
ანკარა დაძაბულობის ესკალაციის წინააღმდეგ გაფრთხილებას იძლევა
თურქეთის კომუნიკაციების დეპარტამენტის ხელმძღვანელმა, ბურჰანეთინ დურანმა განაცხადა, რომ რაკეტა თურქეთის ტერიტორიასთან მიახლოებისას ნატოს თავდაცვის ელემენტების მიერ „დროულად იქნა გაუვნებელყოფილი“.
დურანმა აღნიშნა, რომ სამთავრობო უწყებები პირველივე წუთებიდან ყურადღებით აკვირდებოდნენ ინციდენტს და აამოქმედეს უსაფრთხოებისა და თავდაცვის საჭირო ზომები.
„ამ ფარგლებში, ჩვენი ყველა შესაბამისი ქვედანაყოფი, პირველ რიგში კი ეროვნული თავდაცვის სამინისტრო, სრულ კოორდინაციაში მოქმედებს. თურქეთის საჰაერო სივრცისა და სასაზღვრო უსაფრთხოების დაცვის საკითხში ჩვენი სახელმწიფოს ნება და შესაძლებლობები უმაღლეს დონეზეა,“ - განაცხადა მან.
დურანმა ასევე მოუწოდა ყველა მხარეს, განსაკუთრებით კი ირანს, თავი შეიკავონ იმ ქმედებებისგან, რომლებიც რეგიონულ უსაფრთხოებას რისკის ქვეშ აყენებს და მშვიდობიან მოსახლეობას საფრთხეს უქმნის, რათა თავიდან იქნას აცილებული დაძაბულობის შემდგომი ესკალაცია.
„დიდი მნიშვნელობა აქვს, რომ რეგიონში დაძაბულობა კიდევ უფრო არ გამწვავდეს და კონფლიქტები უფრო ფართო არეალზე არ გავრცელდეს,“ - დასძინა ბურჰანეთინ დურანმა.
დურანმა ასევე მოუწოდა მოქალაქეებსა და მედიასაშუალებებს, დაეყრდნონ მხოლოდ ოფიციალურ განცხადებებს და თავი შეიკავონ გადაუმოწმებელი ინფორმაციის გავრცელებისგან, რამაც შესაძლოა საზოგადოებაში პანიკა ან დეზინფორმაცია გამოიწვიოს.
ეს სამხედრო ჩარევა განხორციელდა გასულ კვირას თურქეთის საჰაერო სივრცეში ირანის კუთვნილი კიდევ ერთი ბალისტიკური რაკეტის შემოჭრის შემდეგ, რამაც გააძლიერა შეშფოთება იმის შესახებ, რომ ახლო აღმოსავლეთში მზარდი კონფლიქტი შესაძლოა ნატოს ტერიტორიაზეც გავრცელდეს.
