სახელმწიფო ტელევიზია NHK-ის ინფორმაციით, კუმამოტოს პრეფექტურის ადმინისტრაციის წარმომადგენელმა განაცხადა, რომ მიწისძვრის შედეგად დაღუპულთა რიცხვი 38-მდე გაიზარდა.

ნანგრევებიდან დაშავებული ამოყვანილი 13 ადამიანის მდგომარეობა კვლავ მძიმეა, ხოლო პრეფექტურის მასშტაბით მიწისძვრის შედეგად, საცხოვრებელი სახლებისა და სამუშაო ადგილების ჩათვლით, სულ 4 600 შენობა დაზიანდა.

ამჟამად 46 ათას ოჯახსა და სამუშაო ადგილზე წყალმომარაგება შეწყვეტილია, ხოლო 206 საევაკუაციო ცენტრში 8 500 ადამიანი აფარებს თავს.

მიწისძვრის ეპიცენტრად მიჩნეულ უკისა და ჰიკავას რაიონებში მობილური ტუალეტები და საშხაპეები დამონტაჟდა.

პრეფექტურის ადმინისტრაციამ გამოქვეყნებულ გაფრთხილებაში აღნიშნა, რომ ჰაერის ტემპერატურა 38 გრადუსის ფარგლებში მერყეობს და მოსალოდნელი მზის დარტყმის რისკის გამო სიფრთხილის გამოჩენაა საჭირო.

მიწისძვრა

იაპონიის მეტეოროლოგიური სააგენტოს (JMA) მონაცემებით, უკისა და ჰიკავას რაიონებში მიწისძვრა 28 ივლისს, ადგილობრივი დროით 16:27 საათზე მოხდა.

10 კილომეტრის სიღრმეზე დაფიქსირებულმა 7,1 მაგნიტუდის სიმძლავრის ბიძგებმა პრეფექტურის მასშტაბით ფართომასშტაბიანი ზიანი გამოიწვია, მათ შორის ხანძრები, გზებისა და ხიდების ნგრევა.

კუმამოტოს პრეფექტურაში 2016 წლის აპრილში მომხდარი 7 მაგნიტუდის სიმძლავრის მიწისძვრის შედეგად 277 ადამიანი დაიღუპა.

იაპონია, რომელიც მსოფლიოში მიწისძვრის რისკის მქონე ერთ-ერთი ყველაზე მაღალი საფრთხის ქვეყანაა, „წყნარი ოკეანის ცეცხლოვან სარტყელზე“ მდებარეობს, სადაც ვულკანები და ოკეანის ღრმულებია განლაგებული.