იაპონიაში, წყნარი ოკეანის სანაპიროსკენ მიმავალი ტაიფუნ „დუჯუანის“ გამო ტრანსპორტის მოძრაობა შეფერხდა და რამდენიმე ღონისძიება გაუქმდა.
იაპონიის მეტეოროლოგიური სააგენტოს განცხადებით, ტაიფუნი „დუჯუანი“ იაპონიის ცენტრალური და აღმოსავლეთ ნაწილის წყნარი ოკეანის სანაპიროებისკენ მიიწევს.
ტაიფუნით გამოწვეული შესაძლო ძლიერი წვიმისა და მეწყრის საფრთხის გამო, დედაქალაქ ტოკიოდან სამხრეთით 100 კილომეტრში მდებარე იძუს არქიპელაგის უდიდეს კუნძულ იძუ-ოშიმაზე განგაშის უმაღლესი დონე გამოცხადდა.
ტაიფუნის გამო, რომელიც იაპონიაში 5-დღიან უქმეებს დაემთხვა, დედაქალაქ ტოკიოში სატრანსპორტო გადაადგილება შეფერხდა, ზოგიერთი ღონისძიება კი გაუქმდა.
მოსალოდნელია, რომ ტაიფუნი ტოკიოს აღმოსავლეთით მდებარე ჩიბას პრეფექტურას გადაუვლის, ხოლო კანტო-კოშინის (რომელიც ტოკიოსაც მოიცავს) და ტოკაის რეგიონებში ძლიერი წვიმებია ნავარაუდევი.
