ისრაელის ელჩი სენეგალში, იუვალ ვაქსი, სოციალურ ქსელში გავრცელებული კადრების მიხედვით, იძულებული გახდა დაეტოვებინა დაკარის უნივერსიტეტის კამპუსი სამშაბათს, მას შემდეგ, რაც სტუდენტებმა პალესტინის მხარდამჭერი ლოზუნგებით გააპროტესტეს.
ვაქსი მიწვეული იყო ჩეიხ ანტა დიოპის უნივერსიტეტში, რომელიც ქვეყნის უდიდესი და ყველაზე პრესტიჟული უმაღლესი სასწავლებელია, საერთაშორისო ურთიერთობების პრაქტიკის შესახებ კონფერენციაზე გამოსასვლელად.
თუმცა, როდესაც ვაქსი კამპუსში შევიდა, დარბაზის გარეთ შეკრებილი ათობით სტუდენტი სკანდირებდა ლოზუნგებს: „თავისუფლება პალესტინას“, „თავისუფლება ღაზას“ და „ისრაელი ომის დამნაშავეა“.
ონლაინ გაზიარებულ ვიდეოებში ჩანს, რომ სტუდენტები პალესტინის დროშებს აფრიალებდნენ, ახლად დანიშნულ ელჩს უსტვენდნენ და ხელს უშლიდნენ სიტყვით გამოსვლაში.
ელჩი კამპუსიდან დაცვის თანხლებით მსმენელებისთვის სიტყვის წარმოთქმის გარეშე გაიყვანეს. პროტესტის მონაწილეები ამ ხნის განმავლობაში აგრძელებდნენ ლოზუნგების სკანდირებას და დროშების ფრიალს.
ვაქსმა, რომელიც ასევე არის ისრაელის არარეზიდენტი ელჩი გამბიაში, გვინეაში, გვინეა-ბისაუში, კაბო ვერდეში და ჩადში, 8 მაისს სენეგალის რესპუბლიკის პრეზიდენტს ბასირუ დიომაიე დიახარ ფაის რწმუნებათა სიგელი გადასცა.
