უკრაინის სახელმწიფო საგანგებო სამსახურმა კვირას განაცხადა, რომ კიევზე რუსეთის მიერ ღამით განხორციელებული თავდასხმების შედეგად ერთი ადამიანი დაიღუპა და 15 დაშავდა.
თავდასხმებმა, რომლებმაც კიევის მასშტაბით მრავალი ხანძარი გამოიწვია და სამოქალაქო ინფრასტრუქტურა დააზიანა.
Facebook-ზე გამოქვეყნებული ოფიციალური განცხადების თანახმად, საგანგებო სიტუაციების ჯგუფები შემთხვევის ადგილზე ხანძრის ჩაქრობასა და ნამსხვრევების გაწმენდაზე მუშაობას განაგრძობენ.
გარდა ამისა, უპილოტო საფრენი აპარატით თავდასხმა ქვეყნის სამხრეთ-აღმოსავლეთში, ზაპოროჟიეს ოლქში სამგზავრო მატარებელზეც განხორციელდა.
ოლქის გუბერნატორმა ივან ფედოროვმა Telegram-ზე გაკეთებულ განცხადებაში დაადასტურა, რომ შემთხვევის შედეგად ერთი ადამიანი დაშავდა.
უკრაინის სამხედრო-საჰაერო ძალებმა კი განაცხადეს, რომ ღამის თავდასხმების დროს 18 რაკეტა და 108 უპილოტო საფრენი აპარატი გააუვნებელყვეს.
ამავდროულად, რუსეთის ჩრდილოეთით, სტავროპოლის მხარეში, სამრეწველო ობიექტზე ღამით განხორციელებული თავდასხმების შემდეგ ხანძარი გაჩნდა. გუბერნატორმა ვლადიმერ ვლადიმეროვმა Telegram-ით განაცხადა: „ობიექტი დასახლებული პუნქტებისგან შორს მდებარეობს, შესაბამისად, საცხოვრებელი კორპუსებისთვის საფრთხე არ არსებობს“.
რუსეთი: სამხედრო ობიექტები იყო სამიზნე
რუსეთის თავდაცვის სამინისტრომ კიევზე თავდასხმა დაადასტურა და განაცხადა, რომ რუსულმა ძალებმა „მასშტაბური“ იერიში მიიტანეს უკრაინის დედაქალაქსა და მის შემოგარენში მდებარე სამხედრო-სამრეწველო ობიექტებზე, ლოგისტიკურ ცენტრებსა და ოდესის ოლქის პორტ იუჟნის ინფრასტრუქტურაზე, რომელიც, მათი მტკიცებით, სამხედრო ტვირთების შესანახად და გადასაზიდად გამოიყენებოდა.
სამინისტრომ აღნიშნა, რომ თავდასხმების სამიზნე იყო კიევის თავდაცვის ინდუსტრიის ისეთი კომპანიები, როგორიცაა Radioniks, Spetsoboronmash/Artem, Meridian და Oakline, რომლებიც აწარმოებენ ან აწვდიან კომპონენტებს რაკეტებისთვის, დრონებისა და სხვა სამხედრო სისტემებისთვის.
რუსეთმა ასევე განაცხადა, რომ რუსულმა ძალებმა დაარტყეს კიევის ინოვაციების ტერმინალსა და ტარასოვკაში მდებარე ლოგისტიკურ ცენტრს, რომელიც უპილოტო საფრენი აპარატების კომპონენტების აწყობისა და განაწილებისთვის გამოიყენებოდა.
სამინისტროს განცხადებით, ეს სამიზნეები მხარს უჭერდა უკრაინის უპილოტო საფრენი აპარატების, რაკეტებისა და ელექტრონული ბრძოლის პროგრამებს.
სამინისტრომ ასევე განაცხადა, რომ რუსულმა ძალებმა ქვეყნის მასშტაბით, ანექსირებულ ყირიმში, აზოვისა და შავი ზღვის აკვატორიაში, ღამის განმავლობაში განხორციელებული საჰაერო თავდასხმებისას 140 უკრაინული დრონი ჩამოაგდეს და გაანადგურეს.
მიმდინარე ომის გამო, რუსეთის ამ განცხადებების დამოუკიდებლად დადასტურება ვერ მოხერხდა.
