კრემლმა განაცხადა, რომ რუსეთის პრეზიდენტმა ვლადიმერ პუტინმა პარასკევს, მოსკოვში, ირანის უშიშროების უმაღლესი ორგანოს ხელმძღვანელი მიიღო. შეხვედრა შედგა იმ დროს, როდესაც ამერიკის შეერთებული შტატების პრეზიდენტი დონალდ ტრამპი ცდილობს, ირანი მის ბირთვულ პროგრამასთან დაკავშირებით შეთანხმებაზე დაითანხმოს.

კრემლის ვებგვერდზე გამოქვეყნებულ განცხადებაში ნათქვამია: „პრეზიდენტმა კრემლში მიიღო ირანის ისლამური რესპუბლიკის ეროვნული უშიშროების უმაღლესი საბჭოს მდივანი ალი ლარიჯანი, რომელიც რუსეთს ვიზიტით ეწვია“.

ტრამპმა პარასკევს დილით გაკეთებულ განცხადებაში აღნიშნა, რომ სჯერა, ირანს, რომელიც რუსეთის ახლო მოკავშირეა, სამხედრო ინტერვენციის თავიდან ასაცილებლად ბირთვულ პროგრამაზე შეთანხმების მიღწევა სურს.

აშშ-ის პრეზიდენტმა ასევე კიდევ ერთხელ გააჟღერა სამხედრო თავდასხმის მუქარა ირანის წინააღმდეგ, რომელმაც ცოტა ხნის წინ მომიტინგეების მიმართ რეპრესიული ზომები გაატარა.

ირანის საელჩომ მოსკოვში სოციალური ქსელის მეშვეობით გავრცელებულ პოსტში აღნიშნა, რომ პუტინსა და ლარიჯანის შორის გამართული მოლაპარაკებები ეკონომიკურ ურთიერთობებსა და „მნიშვნელოვან რეგიონულ და საერთაშორისო საკითხებზე“ იყო ფოკუსირებული, თუმცა დეტალები არ დაუკონკრეტებია.

რუსეთის სახელმწიფო საინფორმაციო სააგენტო RIA Novosti-ს ცნობით, ვიზიტის შესახებ წინასწარ არ იყო გამოცხადებული.

მოსკოვი ვაშინგტონსა და თეირანს შორის შუამავლობის ინიციატივით გამოდის.