კომპანია Meta-მ განაცხადა, რომ WhatsApp-მა მიმდინარე წლის პირველ ნახევარში თაღლითურ ოპერაციებთან დაკავშირებული 6,8 მილიონზე მეტი ანგარიში დაბლოკა.

კომპანიის მიერ სამშაბათს გავრცელებულ წერილობით განცხადებაში ნათქვამია: „მომხმარებლების თაღლითობისგან დაცვისკენ მიმართული ჩვენი პროაქტიული მუშაობის ფარგლებში, WhatsApp-მა გამოავლინა და დაბლოკა 6,8 მილიონზე მეტი ანგარიში, რომლებიც თაღლითობის ცენტრებთან იყო დაკავშირებული“.

Meta-მ აღნიშნა, რომ კვლევებიდან მიღებული მონაცემებისა და გაძლიერებული კონტროლის მცდელობების წყალობით, ამ ანგარიშების უმეტესობა გამოყენებაში ჩაშვებამდე დაიხურა.

Meta-ს ცნობით, თაღლითობის ცენტრები, როგორც წესი, ერთდროულად რამდენიმე სქემას ახორციელებენ, როგორიცაა კრიპტოვალუტით თაღლითობა და ფინანსური პირამიდები. კომპანიამ დასძინა, რომ დაპირებული მოგების სანაცვლოდ წინასწარი გადახდის მოთხოვნა გავრცელებული საგანგაშო ნიშანია.

უსაფრთხოების რჩევები

პლატფორმამ ასევე დანერგა ჯგუფური ჩატის უსაფრთხოების შემაჯამებელი ახალი ფუნქცია, რომელიც მომხმარებლებს მაშინ გამოუჩნდებათ, როდესაც მათ ჯგუფში ამატებს პირი, რომელიც მათ კონტაქტებში შენახული არ არის.

განცხადებაში აღნიშნულია, რომ ეს შეჯამება ჯგუფის შესახებ ინფორმაციასა და უსაფრთხოების რჩევებს შეიცავს და მომხმარებლებს საშუალებას აძლევს, ჩატის ნახვის გარეშე დაუყოვნებლივ დატოვონ ჯგუფი. ასევე ნათქვამია, რომ ჯგუფის შეტყობინებები გათიშული რჩება, სანამ მომხმარებელი დარჩენას არ გადაწყვეტს.

WhatsApp-მა ასევე განაცხადა, რომ საცდელ ეტაპზეა სისტემა, რომელიც მომხმარებლებს გააფრთხილებს, სანამ ისინი კონტაქტებში არმყოფ პირთან საუბარს დაიწყებენ. აღინიშნა, რომ ამ გაფრთხილებების მიზანია, მომხმარებელს მიაწოდოს კონტექსტი და სიფრთხილისკენ მოუწოდოს.

Meta-მ ყურადღება გაამახვილა იმაზე, რომ თაღლითები ხშირად იყენებენ ისეთ ტაქტიკას, როგორიცაა იოლი ფულის დაპირება, ყალბი საინვესტიციო შეთავაზებები ან გადაუხდელი გადასახადებით დამუქრება.

განცხადებაში ხაზგასმულია, რომ მომხმარებლები სიფრთხილით უნდა მოეკიდონ უცნობი პირებისგან ონლაინ კონტაქტს, განსაკუთრებით მაშინ, როდესაც ისინი ფულს ან პირად ინფორმაციას ითხოვენ.