ღაზის სექტორის სამხრეთით მდებარე ქალაქ ხან-იუნისში, ისრაელის არმიის მიერ ნასერის საავადმყოფოზე განხორციელებული საჰაერო დარტყმის შედეგად, პირველადი მონაცემებით, 6 ადამიანი დაიღუპა.
ჯანდაცვის სამინისტროს მიერ გავრცელებულ წერილობით განცხადებაში აღნიშნულია, რომ ღაზის სექტორის სამხრეთით, ქალაქ ხან-იუნისში მდებარე ნასერის საავადმყოფოს ქირურგიულ კორპუსზე განხორციელებული თავდასხმა პაციენტებისა და სამედიცინო პერსონალის წინააღმდეგ ჩადენილი დანაშაულია.
განცხადებაში ნათქვამია, რომ თავდასხმის შედეგად დაიღუპა 6 ადამიანი (სამედიცინო მუშაკები, მათ შორის ექიმი რიზიკ აბუ შუაირა, პაციენტები და მათი თანმხლები პირები) და დაშავდა მრავალი ადამიანი. ხაზგასმულია, რომ იმ სამედიცინო დაწესებულების მიზანში ამოღება, სადაც პაციენტები მკურნალობენ და ექიმები თავიანთ მოვალეობას ასრულებენ, ჯანდაცვის სისტემაზე განხორციელებული სერიოზული თავდასხმაა.
განცხადებაში აღნიშნულია, რომ საავადმყოფოს დაბომბვა წარმოადგენს საერთაშორისო სამართლისა და იმ კონვენციების აშკარა დარღვევას, რომლებიც სამედიცინო დაწესებულებების, მედპერსონალისა და პაციენტების უსაფრთხოების დაცვას უზრუნველყოფს.
განცხადებაში ყურადღება გამახვილებულია იმაზეც, რომ ღაზაში სამედიცინო ობიექტებზე თავდასხმების გაგრძელება კიდევ უფრო ამძიმებს ავადმყოფებისა და დაჭრილების მდგომარეობას, ხოლო რეგიონში არსებული მძიმე ჰუმანიტარული კრიზისის გამო, ჯანდაცვის სისტემის მიერ მომსახურების გაწევის შესაძლებლობა სერიოზული საფრთხის ქვეშაა.
გარდა ამისა, განცხადებაში საერთაშორისო თანამეგობრობას, გაერთიანებული ერების ორგანიზაციის (გაერო) სტრუქტურებსა და უფლებადამცველ ორგანიზაციებს მოუწოდეს, დაუყოვნებლივ მიიღონ ზომები საავადმყოფოების, სამედიცინო პერსონალისა და პაციენტების დასაცავად, შეაჩერონ თავდასხმები და უზრუნველყონ პასუხისმგებელი პირების პასუხისგებაში მიცემა.
გავრცელებული ინფორმაციით, ღაზის სექტორის სამხრეთით, ქალაქ ხან-იუნისში მდებარე ნასერის საავადმყოფოზე ისრაელის არმიის საჰაერო იერიშის შედეგად, პირველადი ცნობებით, 6 ადამიანი დაიღუპა და 20-ზე მეტი დაშავდა.
ისრაელის არმიის თავდასხმების შედეგად, რომელიც 2023 წლის ოქტომბერში დაიწყო და გენოციდის მასშტაბებს აღწევს, ჯანდაცვის სისტემას უდიდესი ზიანი მიადგა.
იმ ფონზე, როდესაც ღაზის საავადმყოფოებისა და კლინიკების უმრავლესობა დარტყმის ობიექტი გახდა და მწყობრიდან გამოვიდა, მედიკამენტების, საწვავისა და სამედიცინო მარაგების შეტანის ბლოკირების გამო სამედიცინო დაწესებულებები რეგიონის მოსახლეობას სათანადო მომსახურებას ვეღარ უწევენ.
