ისრაელის არმია ცეცხლის შეწყვეტის შეთანხმების მიუხედავად ღაზაში სახლების ნგრევასა აგრძელებს

ისრაელის არმიამ გაზარდა ცეცხლის შეწყვეტის შეთანხმების დარღვევები - გაანადგურა სახლები და განახორციელა საარტილერიო დარტყმები ღაზის იმ ტერიტორიებზე, რომლებიც მისი კონტროლის ქვეშაა.

სააგენტო ანადოლუსთან (AA) საუბრისას თვითმხილველებმა განაცხადეს, რომ არმიამ ღაზის ჩრდილოეთით, სამხედრო კონტროლის ქვეშ მყოფ ე.წ. „ყვითელ ზონაში“ მდებარე შუჯაიას უბანში რამდენიმე საცხოვრებელი სახლი ააფეთქა.

სამხრეთით კი მოწმეებმა აღნიშნეს, რომ ისრაელის ჭურვები „ყვითელი ხაზის“ მიღმა, ხან იუნისის აღმოსავლეთ ნაწილებსაც მოხვდა.

მატერიალური ზიანის მასშტაბების შესახებ დამატებითი ინფორმაცია ჯერჯერობით უცნობია.

ღაზის სამოქალაქო თავდაცვის სამსახურის ცნობით, ორშაბათს საღამოს ქალაქ ღაზის ელ-ნასრის უბანში, ერთ-ერთ სახლში ისრაელის კუთვნილი საბრძოლო მასალის აფეთქების შედეგად ორი პალესტინელი დაიღუპა და რამდენიმე დაშავდა.

პალესტინის წარმომადგენელმა გაეროში, რიად მანსურმა ორშაბათს უშიშროების საბჭოს განუცხადა, რომ 10 ოქტომბერს ცეცხლის შეწყვეტის ძალაში შესვლის შემდეგ, ისრაელის არმია ღაზაში დღეში ორ პალესტინელ ბავშვს კლავს, ხოლო დაღუპულთა და დაჭრილთა საერთო რიცხვი 1 000-მდე გაიზარდა.

ღაზის ჯანდაცვის სამინისტროს მონაცემებით, ცეცხლის შეწყვეტის ამოქმედებიდან დღემდე ისრაელის არმიის თავდასხმების შედეგად სულ მცირე 342 პალესტინელი დაიღუპა და დაახლოებით 900 ადამიანი დაშავდა.

2023 წლის ოქტომბრიდან მოყოლებული, ისრაელის არმიამ ღაზაში დაახლოებით 70 000 ადამიანი მოკლა, რომელთა უმეტესობა ქალები და ბავშვები არიან, ხოლო ორწლიანი გენოციდური ომის განმავლობაში 170 900-ზე მეტი ადამიანი დაჭრა; ამ ომმა რეგიონის დიდი ნაწილი ნანგრევებად აქცია.