თურქეთის რესპუბლიკის საგარეო საქმეთა სამინისტრომ გენოციდის განმახორციელებელი ისრაელის მიერ ღაზაზე თავდასხმებთან დაკავშირებით განცხადება გაავრცელა.
სამინისტროს განცხადებაში ნათქვამია:
„ღაზის სამშვიდობო გეგმის განხორციელების შესაძლებლობის მომცემ საგზაო რუკაზე შეთანხმების მიღწევისთანავე, ისრაელის მიერ ღაზაში 30-ზე მეტი მშვიდობიანი მოქალაქის მკვლელობამ და სამედიცინო დაწესებულებების მიზანში ამოღებამ კიდევ ერთხელ აჩვენა, რომ ნეთანიაჰუს მთავრობას პალესტინელებთან მშვიდობის დამყარების ნება არ გააჩნია.
ნეთანიაჰუს ერთადერთი მიზანი პალესტინელების საკუთარი სამშობლოდან განდევნა და რეგიონში მშვიდობისა და სტაბილურობის დამყარებისთვის ხელის შეშლაა. ამ მიზნით, იგი არ ერიდება ისეთი ნაბიჯების გადადგმას, რომლებიც დაარღვევს რეგიონში არსებულ მყიფე წონასწორობას და ძირს გამოუთხრის შუამავალი ქვეყნების, უპირველეს ყოვლისა კი აშშ-ის მცდელობებს.
ნეთანიაჰუს ექსპანსიონისტური და მილიტარისტული აზროვნების წინააღმდეგ, რომელსაც მთელი ახლო აღმოსავლეთის კონფლიქტის ზონად გადაქცევა სურს, საერთაშორისო თანამეგობრობის მიერ უფრო გადამწყვეტი, თანმიმდევრული და ძლიერი პოზიციის დაფიქსირება უკვე აუცილებლობად იქცა.
მოვუწოდებთ ყველა ქვეყანას, რომელიც მხარს უჭერს ჩვენს რეგიონსა და პალესტინაში მშვიდობისა და კეთილდღეობის დამყარებას, იმოქმედონ საერთო პასუხისმგებლობის გრძნობით, დაიცვან საერთაშორისო სამართალი და ჰუმანური ღირებულებები“.
