თურქეთის რესპუბლიკის პრეზიდენტ ერდოღანის ვიზიტი ყაზახეთში დედაქალაქ ასტანადან დაიწყება.
დამოუკიდებლობის სასახლეში ყაზახეთის პრეზიდენტ ყასიმ-ჟომართ თოყაევთან პირისპირ შეხვედრის შემდეგ, ერდოღანი კოლეგასთან ერთად თურქეთ-ყაზახეთის მაღალი დონის სტრატეგიული თანამშრომლობის საბჭოს სხდომას უხელმძღვანელებს.
მოლაპარაკებების დროს „გაფართოებული სტრატეგიული პარტნიორობის“ დონეზე არსებული ორმხრივი ურთიერთობები ყველა ასპექტში შეფასდება და განხილული იქნება ორ ქვეყანას შორის სტრატეგიული კავშირების გაძლიერებისკენ გადასადგმელი ნაბიჯები.
სავაჭრო ბრუნვის მიზანი 15 მილიარდი დოლარია
ვიზიტის ეკონომიკურ ნაწილში, პრიორიტეტულ საკითხებს შორის იქნება ორ ქვეყანას შორის განსაზღვრული 15 მილიარდი დოლარის ოდენობის სავაჭრო ბრუნვის მიზანი და თანამშრომლობის პროექტები ენერგეტიკის სფეროში. ამ ფარგლებში მოსალოდნელია სხვადასხვა სფეროში თანამშრომლობის ახალი პროტოკოლებისა და შეთანხმებების გაფორმება. გარდა ამისა, დაგეგმილია ერდოღანისა და თოყაევის მონაწილეობა თურქეთ-ყაზახეთის ბიზნესფორუმში, სადაც ისინი ორივე ქვეყნის ბიზნესმენებს შეხვდებიან და საინვესტიციო შესაძლებლობებს განიხილავენ.
ასტანაში შეხვედრების დასრულების შემდეგ, პრეზიდენტი ერდოღანი თურქული სამყაროს სულიერ დედაქალაქ თურქესტანში გაემგზავრება, სადაც თურქულ სახელმწიფოთა ორგანიზაციის (TDT) არაფორმალურ ლიდერთა სამიტში მიიღებს მონაწილეობას.
სამიტის ფარგლებში სიტყვით გამოსვლისას ერდოღანი, სავარაუდოდ, მნიშვნელოვან გზავნილებს გააჟღერებს რეგიონულ და გლობალურ საკითხებზე, პირველ რიგში კი ახლო აღმოსავლეთში მიმდინარე მოვლენებზე; იგი ასევე გამართავს ორმხრივ შეხვედრებს მონაწილე სახელმწიფოთა და მთავრობათა მეთაურებთან.
