ჰამასმა განაცხადა, რომ პალესტინელ ხალხს აქვს საკუთარი მიწების მართვის უფლება და იარაღს არ დაყრიან, სანამ ისრაელის ოკუპაცია გაგრძელდება.

ჰამასის დიასპორის ოფისების ხელმძღვანელმა ხალიდ მეშალმა განაცხადა, რომ მათ გარედან ვერ აიძულებენ რომელიმე პოლიტიკური სისტემის  დამყარებას.

კვირას ჰამასმა გაავრცელა ვიდეო მეშალის გამოსვლით, რომელიც გაიმართა ეგვიპტის დედაქალაქ კაიროში ისრაელთან ტყვეების გაცვლისა და ცეცხლის შეწყვეტის შეთანხმების ფარგლებში გათავისუფლებული და გადასახლებული პალესტინელი პატიმრების პატივსაცემად.

„ღაზა მხოლოდ მის ხალხს ეკუთვნის; არც ღაზის და არც დასავლეთ სანაპიროს მოსახლეობა არ გაცვლის სამშობლოს სხვა რამეში“. - თქვა მან.

„პალესტინას ალტერნატივა არ აქვს“

მეშალმა ხაზგასმით აღნიშნა, რომ ისრაელის ბლოკადის ქვეშ მყოფი ღაზისა და ოკუპირებული დასავლეთ სანაპიროს პალესტინელები მტკიცედ დარჩებიან თავიანთ მიწაზე.

„პალესტინის ალტერნატივა არის პალესტინა. არაბული და ისლამური ქვეყნების მიმართ პატივისცემის მიუხედავად, ვერაფერი შეცვლის ჩვენს სამშობლოს“. - თქვა მან.

მეშალმა თქვა, რომ პალესტინას მხოლოდ მისი ხალხი მართავს და მათ გარედან ვერ აიძულებენ რომელიმე პოლიტიკური სისტემის  დამყარებას.

მან ყურადღება გაამახვილა ეროვნული ერთიანობის მნიშვნელობაზე პალესტინის წინაშე მდგარი გამოწვევების წინააღმდეგ ბრძოლაში და მოუწოდა არაბულ სამყაროს, მხარი დაუჭირონ პალესტინელ ხალხს.

მან აღნიშნა, რომ ღაზა დიდ შეთქმულებასთან არის პირისპირ, არსებობს მცდელობები, რომ მოსახლეობა შიმშილით აიძულონ გადასახლდეს.

„ღაზის მომავალი, მმართველობა, იარაღი და წინააღმდეგობის ძალა საფრთხის ქვეშაა“. - თქვა მან.