ავღანელი მაღალჩინოსნის თქმით, ავღანეთის დედაქალაქში ნარკოდამოკიდებულთა სარეაბილიტაციო ცენტრზე პაკისტანის მიერ განხორციელებული საჰაერო თავდასხმის შედეგად სულ მცირე 400 ადამიანი დაიღუპა.

ავღანეთის მთავრობის სპიკერის მოადგილემ, ჰამდულა ფიტრატმა პლატფორმა X-ზე დაწერა: „პაკისტანის არმიამ დღეს საღამოს, ადგილობრივი დროით დაახლოებით 21:00 საათზე, საჰაერო იერიში მიიტანა 2000-საწოლიან ნარკომანიის სამკურნალო ჰოსპიტალ „ომიდზე“.

ფიტრატმა აღნიშნა, რომ თავდასხმის შედეგად საავადმყოფოს დიდი ნაწილი დაინგრა და არსებობს „სერიოზული შეშფოთება დაღუპულთა დიდი რაოდენობის გამო“.

მისივე ინფორმაციით, დაშავებულია დაახლოებით 250 ადამიანი და შემთხვევის ადგილზე ამჟამად სამაშველო ჯგუფები მუშაობენ.

მანამდე გავრცელდა ცნობები ქაბულში მომხდარი საჰაერო თავდასხმების შესახებ; ავღანეთის მთავრობამ პაკისტანი ქვეყნის საჰაერო სივრცის დარღვევასა და 2000-საწოლიანი ნარკოლოგიური სარეაბილიტაციო ცენტრის, „ომიდის“ დაბომბვაში დაადანაშაულა.

ისლამაბადმა კი ბრალდებები უარყო.

შემთხვევის ადგილზე ჟურნალისტებთან საუბრისას ზამანმა აღნიშნა: „ვეძებთ დაშავებულებსა და პაციენტებს, რომლებიც საავადმყოფოში იმყოფებოდნენ“.

„ცრუ ბრალდება“

ეს განცხადებები მოჰყვა პაკისტანის საინფორმაციო სამინისტროს მიერ ქაბულის ბრალდებების უარყოფას. ისლამაბადმა განაცხადა, რომ მათი სამიზნე იყო „ავღანეთის თალიბანისა და ‘ფიტნე ელ-ხავარის’ სამხედრო ობიექტები, ტერორისტული ინფრასტრუქტურა, ტექნიკური აღჭურვილობისა და საბრძოლო მასალების საწყობები ქაბულსა და ნანგარჰარის პროვინციაში, რომლებიც უდანაშაულო პაკისტანელი მშვიდობიანი მოქალაქეების წინააღმდეგ გამოიყენებოდა“.

განცხადებაში ასევე აღნიშნულია: „თავდასხმის შემდეგ ტერორისტული ორგანიზაციის კუთვნილი საბრძოლო მასალების აფეთქება სრულად აქარწყლებს ამ ცრუ ბრალდებას“.

ავღანეთის მთავრობის სპიკერმა, ზაბიჰულა მუჯაჰიდმა კი მომხდარი დაგმო და მას „ყველა აღიარებული პრინციპის საწინააღმდეგო ქმედება და კაცობრიობის წინააღმდეგ ჩადენილი დანაშაული“ უწოდა.

გასულ თვეში სასაზღვრო დაძაბულობის ესკალაციის შემდეგ, ავღანეთსა და პაკისტანს შორის ურთიერთობები გაუარესდა, რასაც მსხვერპლი და მატერიალური ზიანი მოჰყვა.

თებერვლის ბოლოდან დაწყებულმა ტრანსსასაზღვრო შეტაკებებმა ორივე მხარეს ჯამში 107 ადამიანის სიცოცხლე იმსხვერპლა; მათ შორის პაკისტანში დაიღუპა 13 ჯარისკაცი და 5 მშვიდობიანი მოქალაქე, ერთი ჯარისკაცი კი კვლავ დაკარგულად ითვლება.

ქაბულის განცხადებით, ავღანეთში 13 ჯარისკაცი და 76 სამოქალაქო პირი დაიღუპა, თუმცა ეს მაჩვენებელი არ მოიცავს იმ ახალ მსხვერპლს, რომლის შესახებაც ავღანელმა მაღალჩინოსნებმა ორშაბათს განაცხადეს.

გაეროს მონაცემებით, 26 თებერვლიდან 5 მარტამდე პერიოდში ავღანეთში სამოქალაქო პირებს შორის 185 მსხვერპლი დაფიქსირდა, მათ შორის 56 ადამიანი ირიბი ცეცხლისა (არაპირდაპირი ცეცხლი) და საჰაერო თავდასხმების შედეგად დაიღუპა.