G7-ის ლიდერებმა გაკეთებულ განცხადებაში ისრაელის უსაფრთხოებისადმი საკუთარი მხარდაჭერა კიდევ ერთხელ დაადასტურეს.
იმ დროს, როდესაც ახლო აღმოსავლეთში დაძაბულობა კვლავ იზრდება, კანადაში შეკრებილმა „დიდი შვიდეულის“ (G7) ლიდერებმა განაცხადეს, რომ ირანი ვერასდროს შეძლებს, ბირთვული იარაღი ჰქონდეს.
კანადის, საფრანგეთის, გერმანიის, იტალიის, იაპონიის, გაერთიანებული სამეფოსა და აშშ-ის ლიდერებმა განცხადებაში აღნიშნეს: „ირანი რეგიონული არასტაბილურობისა და ტერორიზმის მთავარი წყაროა“.
მათ დაამატეს: „ჩვენ ყოველთვის ნათლად ვაცხადებდით, რომ ირანი ბირთვულ იარაღს ვერასდროს მოიპოვებს“.
ლიდერებმა, რომლებმაც კიდევ ერთხელ დაადასტურეს ახლო აღმოსავლეთში მშვიდობისა და სტაბილურობისადმი ერთგულება, განაცხადეს: „ამ კონტექსტში, ჩვენ ვადასტურებთ ისრაელის თავდაცვის უფლებას. კიდევ ერთხელ გამოვხატავთ ჩვენს მხარდაჭერას ისრაელის უსაფრთხოებისადმი“.
მათ ასევე ხაზი გაუსვეს მშვიდობიანი მოსახლეობის დაცვის მნიშვნელობას.
„ვიმედოვნებთ, რომ ირანის კრიზისის მოგვარება ახლო აღმოსავლეთში უფრო ფართო დაძაბულობის შემცირებას გამოიწვევს, მათ შორის ღაზაში ცეცხლის შეწყვეტას“, - აღინიშნა განცხადებაში.
ლიდერებმა განაცხადეს, რომ ისინი კვლავაც „ფხიზლად“ იქნებიან საერთაშორისო ენერგეტიკულ ბაზრებზე გავლენის საკითხთან დაკავშირებით და მზად არიან კოორდინაციისთვის ბაზრის სტაბილურობის შესანარჩუნებლად.
აშშ-ის პრეზიდენტმა დონალდ ტრამპმა ჟურნალისტებს განუცხადა, რომ ახლო აღმოსავლეთში არსებული დაძაბულობის გამო G7-ის სამიტს ნაადრევად დაასრულებს და ორშაბათს ვაშინგტონში დაბრუნდება: „აშკარა მიზეზების გამო, იძულებული ვარ, ადრე დავბრუნდე“.
მანამდე ტრამპმა ისრაელსა და ირანს შორის მზარდი დაძაბულობის გამო მშვიდობიან მოსახლეობას თეირანის დაუყოვნებლივ ევაკუაციისკენ მოუწოდა.
პლატფორმა Truth Social-ზე ტრამპმა დაწერა: „ირანს უნდა მოეწერა ხელი შეთანხმებაზე, რომლის ხელმოწერაც მე ვუთხარი. რა სამწუხაროა, ადამიანების სიცოცხლის ფუჭად ხარჯვა. მარტივად რომ ვთქვათ, ირანს არასდროს ექნება ბირთვული იარაღი! ეს მე არაერთხელ მითქვამს!“ მან დაამატა: „ყველამ დაუყოვნებლივ დატოვოს თეირანი!“.
დაძაბულობა მას შემდეგ გამწვავდა, რაც პარასკევს ისრაელმა ირანის მასშტაბით კოორდინირებული საჰაერო და უპილოტო საფრენი აპარატებით თავდასხმები განახორციელა მრავალ ობიექტზე, მათ შორის სამხედრო და ბირთვულ ობიექტებზე, რასაც თეირანის მხრიდან საპასუხო დარტყმების დაწყება მოჰყვა.
