სამხრეთ კორეულმა კრიპტოვალუტის ბირჟა Bithumb-მა შაბათს განაცხადა, რომ სარეკლამო აქციის ფარგლებში მომხმარებლებს შეცდომით 40 მილიარდ დოლარზე მეტი ღირებულების ბიტკოინი დაურიგა, რამაც ბირჟაზე გაყიდვების მკვეთრი ტალღა გამოიწვია.

Bithumb-მა ბოდიში მოიხადა პარასკევს მომხდარი შეცდომის გამო და აღნიშნა, რომ უკვე დაიბრუნა 620,000 ბიტკოინის 99,7%, რომელთა ღირებულება მიმდინარე ფასებით დაახლოებით 44 მილიარდი დოლარია. შეცდომით განხორციელებული დარიგებიდან 35 წუთში ბირჟამ 695 დაზარალებულ მომხმარებელს ვაჭრობისა და თანხის გატანის ოპერაციები შეუზღუდა.

ბირჟა გეგმავდა, რომ პრომოაქციის ფარგლებში თითოეული მომხმარებლისთვის 2,000 კორეული ვონი (1,37 დოლარი) ან ოდნავ მეტი მცირე ფულადი ჯილდო დაერიგებინა, თუმცა მედიაში გავრცელებული ინფორმაციით, გამარჯვებულებმა ამის ნაცვლად სულ მცირე 2,000 ბიტკოინი მიიღეს.

„გვსურს მკაფიოდ განვაცხადოთ, რომ ამ შემთხვევას კავშირი არ აქვს გარე კიბერშეტევებთან ან უსაფრთხოების დარღვევასთან და სისტემის უსაფრთხოების ან მომხმარებელთა აქტივების მართვის მხრივ არანაირი პრობლემა არ არსებობს“, — ნათქვამია Bithumb-ის განცხადებაში.

Bithumb-ის გრაფიკების მიხედვით, ბიტკოინის ფასი ბირჟაზე პარასკევს საღამოს მცირე ხნით 17%-ით დაეცა და 81,1 მილიონ ვონამდე ჩამოვიდა. მოგვიანებით ფასი აღდგა და ბოლოს 104,5 მილიონ ვონზე ივაჭრებოდა.

Bithumb-ი სამხრეთ კორეის კრიპტოვალუტის ბაზარზე დომინანტი მოთამაშის, Upbit-ის შემდეგ მეორე ადგილს იკავებს.