ოთხშაბათს ჩილეში ათასობით სტუდენტმა შეავსო სანტიაგოს ცენტრი ჩილეს სტუდენტთა კონფედერაციის მიერ ორგანიზებულ მასშტაბურ აქციაზე, რომელიც პრეზიდენტ ხოსე ანტონიო კასტის მთავრობის მიერ გატარებულ მკაცრი ეკონომიის პოლიტიკას აპროტესტებდა.
მოვლენები, რომლებიც მასობრივი პროტესტით დაიწყო, უსაფრთხოების ძალებთან ძალადობრივ შეტაკებებში გადაიზარდა; დაშავდა სულ მცირე 25 ადამიანი, მათ შორის 12 პოლიციელი.
ადგილობრივი მედიის ცნობით, მომიტინგეებმა გამოიყენეს ქვები და ხელკეტები; დაზიანდა სახელმწიფო საკუთრება, ხოლო პოლიციამ ხალხის დასაშლელად ძალა გამოიყენა.
მომხდარის გამო სანტიაგოს ცენტრში რამდენიმე მეტროს სადგური დროებით დაიკეტა, დედაქალაქის მასშტაბით კი ტრანსპორტის მოძრაობა მნიშვნელოვნად შეფერხდა.
საპროტესტო აქციები მიმართულია ხოსე ანტონიო კასტის ფინანსური კონსოლიდაციის ფართომასშტაბიანი გეგმის წინააღმდეგ; ეს გეგმა ითვალისწინებს 18 თვის განმავლობაში სახელმწიფო ხარჯების დაახლოებით 6 მილიარდი დოლარით შემცირებას და სამინისტროებში ბიუჯეტის დაახლოებით 3%-იან საერთო კლებას.
სტუდენტთა ლიდერები, რომლებსაც მხარს უჭერენ მასწავლებელთა და მუშათა პროფკავშირები, აცხადებენ, რომ განათლების სექტორი არაპროპორციულად ზარალდება; ისინი აფრთხილებენ მთავრობას, რომ ფინანსური რესურსების შემცირებამ შესაძლოა დაასუსტოს სკოლები, უნივერსიტეტები და საჯარო სერვისები.
აქციის ორგანიზატორები აღნიშნავენ, რომ თუ მათი მოთხოვნები არ დაკმაყოფილდება, შესაძლოა უფრო მასშტაბური საპროტესტო აქციები მოაწყონ.
