გაზეთ „ჰაარეცის“ (Haaretz) ცნობით, ბენ-გვირმა აშშ-ის საელჩოს სავიზო განაცხადით მას შემდეგ მიმართა, რაც ისრაელელი ბიზნესმენის, იაკოვ ელჰარარის ქალიშვილის ქორწილში დასწრება და დიპლომატიური შეხვედრის გამართვა გადაწყვიტა.
სტატიაში აღნიშნულია, რომ ბენ-გვირმა ვიზიტი მას შემდეგ გააუქმა, რაც აშშ-ის საელჩომ იგი სავიზო პროცედურებისთვის თითის ანაბეჭდების ჩასაბარებლად დაიბარა.
ისრაელის მედია ხაზს უსვამს, რომ ბენ-გვირს, სხვა მინისტრების მსგავსად, დიპლომატიური ვიზის მიღების უფლება აქვს, თუმცა აშშ-ის საელჩომ „არაორდინალური“ პროცედურა გამოიყენა და ულტრამემარჯვენე მინისტრს თითის ანაბეჭდების ჩაბარება მოსთხოვა.
ბენ-გვირის ოფისმა დაადასტურა ინფორმაცია იმის შესახებ, რომ აშშ-ის საელჩომ ვიზისთვის თითის ანაბეჭდები მართლაც მოითხოვა.
სადავო გახდა ვიზიტის დაფინანსების საკითხიც
„ჰაარეცის“ ინფორმაციით, კამათი გამოიწვია იმ ფაქტმაც, რომ ბენ-გვირის აშშ-ში ვიზიტის ხარჯები ისრაელელ ბიზნესმენს უნდა დაეფარა.
სტატიაში ნათქვამია, რომ ისრაელის სახელმწიფო კონტროლიორის თავმჯდომარეობით შეკრებილმა კომიტეტმა ბიზნესმენ ელჰარარის მიერ ბენ-გვირის მგზავრობის დაფინანსება გააპროტესტა. აღნიშნული პროტესტის შემდეგ, ბენ-გვირმა მგზავრობის ხარჯების ბიზნესმენის მიერ ანაზღაურების მოთხოვნა უკან წაიღო.
ისრაელში მინისტრებს კერძო წყაროებით დაფინანსებულ უცხოურ ვიზიტებზე ნებართვა მხოლოდ იმ პირობით ეძლევათ, თუ ეს არ იწვევს ინტერესთა კონფლიქტს, არ წარმოადგენს სამსახურებრივი უფლებამოსილების ბოროტად გამოყენებას და არ ეწინააღმდეგება ეთიკის ნორმებს.
