კანადაში, ქალაქ ტორონტოსთან ახლოს მდებარე ბიბლიოთეკაში მუსლიმ ქალზე თავდასხმასა და მისი თავსაბურავისთვის ცეცხლის წაკიდების მცდელობაში ეჭვმიტანილი პირი დააკავეს.

დურჰამის რეგიონალური პოლიციის განცხადებაში, რომელიც კვირას გაკეთდა, ნათქვამია: "(დაზარალებული) ბიბლიოთეკაში მეცადინეობდა, როდესაც მას უცნობი ქალი მიუახლობდა". "ქალმა დაზარალებულის შეურაცხყოფა დაიწყო და სხვადასხვა საგნები დაუშინა თავში".

"შემდეგ ეჭვმიტანილმა დაზარალებული თავსაბურავის მოხსნა სცადა და უცნობი სითხე გადაასხა. ამის შემდეგ აანთო სანთებელა და თავსაბურავისთვის ცეცხლის წაკიდება სცადა".

ბიბლიოთეკის დაცვის თანამშრომლები ჩაერივნენ, როდესაც დაზარალებულმა დახმარების თხოვნა ყვირილით დაიწყო. პოლიციის განცხადებით, ეჭვმიტანილი შემთხვევის ადგილიდან გაიქცა, მაგრამ რამდენიმე საათში დაიჭირეს და დააკავეს.

კანადის მუსლიმთა ეროვნულმა საბჭომ (NCCM) განაცხადა, რომ მომხდარით "შეძრწუნებულნი არიან".

"სირცხვილია, რომ ჩვენს საზოგადოებაში ძალადობის მსგავსი შემთხვევები ჩვეულებრივ მოვლენად იქცა", - თქვა NCCM-ის აღმასრულებელმა დირექტორმა სტივენ ბრაუნმა და ხაზი გაუსვა, რომ ბოლო წლებში ისლამოფობიური თავდასხმების რიცხვმა "საგანგაშოდ იმატა".

"დროა, ჩვენმა არჩეულმა ლიდერებმა ერთად მოაგვარონ ეს პრობლემა", - დასძინა მან.

აიაქსის მერმა შონ კოლიერმა და ბიბლიოთეკის საბჭოს თავმჯდომარემ პიალი კორეამ მუნიციპალიტეტის ვებსაიტზე ერთობლივი განცხადება გამოაქვეყნეს:

"მივმართავთ ამ საშინელი თავდასხმის მსხვერპლს და ყველას, ვინც ამ თავდასხმით შეძრწუნებულია, განაწყენებულია ან იმედგაცრუებულია, განსაკუთრებით რამადანის თვეში - მშვიდობისა და სულიერი კავშირის თვეში: ჩვენ აქ ვართ თქვენს მხარდასაჭერად და ვეწინააღმდეგებით სიძულვილისა და შეუწყნარებლობის ნებისმიერ ფორმას".

ბრაუნმა განაცხადა, რომ NCCM-მა პოლიციას მოსთხოვა, ეს შემთხვევა სიძულვილის ნიადაგზე ჩადენილ დანაშაულად დაკვალიფიცირდეს.