ირანული მედიის ცნობით, აშშ-ის მიერ ირანის წინააღმდეგ ახალი თავდასხმების დაწყებასთან ერთად, ქვეყნის სხვადასხვა რეგიონში აფეთქებების შესახებ იტყობინებიან.
სახელმწიფო ტელევიზია IRIB-ის ინფორმაციით, აფეთქება მოხდა ქვეყნის სამხრეთით მდებარე ჰორმოზგანის პროვინციის ადმინისტრაციულ ცენტრ ბენდერ-აბასში.
ნახევრად ოფიციალურმა საინფორმაციო სააგენტო Fars-მა გაავრცელა ინფორმაცია, რომ აფეთქებების ხმა გაისმა კუნძულ ქეშმსა და კუნძულთან ახლოს მდებარე წყლებში, ასევე იტყობინებიან კიდევ ერთი აფეთქების შესახებ ჰორმოზგანში მდებარე სირიკში.
ირანის სახელმწიფო საინფორმაციო სააგენტო IRNA-ს ცნობით, აფეთქება მოხდა სამხრეთით მდებარე ფარსის პროვინციის ქალაქ შირაზში.
უფრო ადრე გავრცელდა ინფორმაცია, რომ ქვეყნის სამხრეთ-აღმოსავლეთით მდებარე სისტანისა და ბელუჯისტანის პროვინციებში, ჩაბაჰარსა და კონარაკში, 14 აფეთქების ხმა გაისმა.
ნახევრად ოფიციალური საინფორმაციო სააგენტო Mehr-ის ცნობით, ირანის სამხრეთით მდებარე ბუშირის ატომურ ელექტროსადგურთან ჰაერსაწინააღმდეგო თავდაცვის სისტემების მუშაობის ხმა გაისმა.
სააგენტო Mehr-მა ასევე გაავრცელა ინფორმაცია ისპაჰანში მომხდარი ორი აფეთქების შესახებ.
თუმცა, მოგვიანებით ირანულმა მედიამ გაავრცელა ისპაჰანის პროვინციის უსაფრთხოებისა და სამართალდამცავი ორგანოების საკითხებში გუბერნატორის მოადგილის განცხადება, რომლის თანახმადაც პროვინციაში არანაირი მტრული თავდასხმა ან აფეთქება არ მომხდარა.
ინფორმაცია მსხვერპლის ან მიყენებული ზიანის შესახებ არ გავრცელებულა.
