ტრამპი და რუბიო კონფლიქტების მოსაგვარებლად „მშვიდობის საბჭოს“ გამოყენების ინიციატივით გამოდიან

ვაშინგტონი - ხუთშაბათს, როდესაც აშშ-ის პრეზიდენტმა დონალდ ტრამპმა „მშვიდობის საბჭოს“ პირველი სხდომა გამართა, რომელიც ღაზის სექტორის აღდგენასა და სტაბილურობას მიეძღვნა და სადაც 17 მილიარდ დოლარზე მეტი დახმარების პირობა დაიდო, მან და მისმა მთავარმა დიპლომატმა მარკო რუბიომ მიანიშნეს, რომ საბჭოს უფლებამოსილება პალესტინის ტერიტორიების ფარგლებს გასცდება.

„მშვიდობის საბჭოს“ სტრატეგიული ხედვის წარდგენისას, რუბიომ 45-ზე მეტი ქვეყნის ლიდერსა და წარმომადგენელს განუცხადა, რომ ღაზაში არსებული ვითარება „ზედმეტად რთულია იმისთვის, რომ არსებული სტრუქტურების ფარგლებში გადაიჭრას“.

ამერიკელმა დიპლომატმა იმედი გამოთქვა, რომ „მშვიდობის საბჭო“ საერთაშორისო კონფლიქტებში მედიაციისთვის უფრო ფართო პლატფორმად იქცევა: „ვიმედოვნებ, რომ ეს საბჭო სხვა რთული და პრობლემური სიტუაციებისთვისაც მოდელი გახდება, რათა ისინიც ანალოგიურად გადაიჭრას, თუმცა ამჟამად მთავარი ფოკუსი ღაზაა“.

2026 წლის იანვარში შექმნილი „მშვიდობის საბჭო“ თავდაპირველად ისრაელსა და ჰამასს შორის 2025 წელს მიღწეული ცეცხლის შეწყვეტის შემდეგ, ღაზის სამშვიდობო გეგმისა და აღდგენის პროცესის ზედამხედველობისთვის ჩამოყალიბდა (მიუხედავად იმისა, რომ ისრაელი ცეცხლის შეწყვეტის შეთანხმებას კვლავ არღვევს). თუმცა, მისი წესდება იძლევა უფრო ფართო მანდატის შესაძლებლობას, რათა ხელი შეუწყოს სტაბილურობასა და ხანგრძლივ მშვიდობას კონფლიქტურ ზონებში მთელ მსოფლიოში.

„ამას სხვაგანაც გავაკეთებთ“

ტრამპმა, რომელიც მიესალმა საბჭოში „გავლენიანი პირების“ მონაწილეობას, პირობა დადო, რომ ღაზა „წარმატებული“ და „მშვიდობიანი“ გახდება და აღნიშნა, რომ ეს მოდელი სხვაგანაც იქნება გამოყენებული. ტრამპმა ასევე განაცხადა, რომ თავისი მეორე ვადის პირველ წელს მან „რვა ომი მოაგვარა და მეცხრე გზაშია“.

„ზოგიერთი ომი 32 წელი გრძელდებოდა - 32, 34 ან 37 წელი. ეს დიდი დროა. ჩვენ თითოეული მათგანი დაახლოებით ორ დღეში დავასრულეთ“.

ტრამპის მტკიცება ერთი წლის განმავლობაში „რვა ომის“ მოგვარების შესახებ მოიცავს როგორც სრულ ცეცხლის შეწყვეტას და შეთანხმებებს, ისე მიმდინარე დავების დარეგულირების მცდელობებს. მის მიერ ხშირად დასახელებულ სიაში შედის: სომხეთი–აზერბაიჯანი, კონგოს დემოკრატიული რესპუბლიკა–რუანდა, ისრაელი–ირანი, ინდოეთი–პაკისტანი, ტაილანდი–კამბოჯა, ღაზაში ისრაელ–ჰამასის დაზავება (რომლის მუდმივ ფორმატში გადაყვანასაც „მშვიდობის საბჭო“ ცდილობს), ასევე ეგვიპტე–ეთიოპია და სერბეთი–კოსოვო.

აშშ-ის პრეზიდენტმა „მშვიდობის საბჭოს“ ერთ-ერთი ყველაზე ეფექტური ორგანო უწოდა: „ძალაუფლებისა და პრესტიჟის თვალსაზრისით მას ანალოგი არ ჰქონია“. ტრამპმა ასევე შეამსუბუქა კრიტიკა გაეროს მიმართ და ორგანიზაციის შენობების რემონტისთვის აშშ-ის მხრიდან დაფინანსების გამოყოფის პირობა დადო. მან „მშვიდობის საბჭო“ ფაქტობრივად გაეროზე მაღლა მდგომ საზედამხედველო ორგანოდ წარმოაჩინა, რომელიც უზრუნველყოფს ორგანიზაციის სწორად ფუნქციონირებას და საჭირო ფინანსების მიღებას: „ჩვენ გავაძლიერებთ გაეროს. დავრწმუნდებით, რომ მისი ობიექტები კარგ მდგომარეობაშია... ფინანსურად დავეხმარებით და ხელს შევუწყობთ მის გადარჩენას. ვფიქრობ, გაეროს დიდი პოტენციალი აქვს, მართლაც დიდი პოტენციალი, რომლისთვისაც მას ჯერ არ მიუღწევია“.