„მიუღებელია ისრაელი ძალადობის ახალ ქმედებები“, - აცხადებს თურქეთის საგარეო საქმეთა სამინისტრო.
თურქეთმა მკაცრად დაგმო ისრაელის უახლესი საჰაერო თავდასხმები ბლოკადაში მყოფ ღაზაში, რომელმაც ასობით პალესტინელის სიცოცხლე იმსხვერპლა. მან ეს თავდასხმები დაახასიათა, როგორც თელ-ავივის „გენოციდის პოლიტიკის“ გაგრძელება.
თურქეთის საგარეო საქმეთა სამინისტრომ საკითხთან დაკავშირებით გაკეთებულ განცხადებაში აღნიშნა, რომ ეს ესკალაცია წარმოადგენს ნეთანიაჰუს მთავრობის მიერ განხორციელებული სისასტიკის ახალ ეტაპს.
„ისრაელი, საერთაშორისო სამართლისა და საყოველთაო ღირებულებების უმძიმესი დარღვევით, კაცობრიობას ეწინააღმდეგება“, - ნათქვამია განცხადებაში.
სამინისტრომ ასევე ხაზი გაუსვა, რომ ისრაელის ქმედებები საფრთხეს უქმნის რეგიონულ სტაბილურობას იმ დროს, როდესაც მიმდინარეობს გლობალური ძალისხმევა მშვიდობის აღსადგენად. „მიუღებელია ისრაელის ძალადობის ახალი ქმედებები“, - ნათქვამია განცხადებაში.
თავის მხრივ, ანკარამ საერთაშორისო საზოგადოებას მოუწოდა მტკიცე პოზიცია დაიკავოს ისრაელის აგრესიის წინააღმდეგ და ხაზი გაუსვა დაუყოვნებელი, მყარი ცეცხლის შეწყვეტისა და პალესტინის ღაზას სექტორში ჰუმანიტარული დახმარების შეუფერხებელი მიწოდების მნიშვნელობას.
„თურქეთი კიდევ ერთხელ ხაზს უსვამს თავის ურყევ მხარდაჭერას პალესტინელი ხალხის სამართლიანი საქმისადმი და ადასტურებს თავის ვალდებულებას, წვლილი შეიტანოს რეგიონში მშვიდობისა და სტაბილურობის უზრუნველყოფის ძალისხმევაში“, - ამ სიტყვებით სრულდება საგარეო საქმეთა სამინისტროს განცხადება.
