Politico-ს ინფორმაციით, საფრანგეთისა და გერმანიის მიერ მომზადებული წინადადება მონტენეგროს ქალაქ ტივატში გუშინ გამართული ლიდერების შეხვედრის წინ იქნა წამოჭრილი.

წინადადების ფარგლებში იგეგმება, რომ დასავლეთ ბალკანეთის კანდიდატ ქვეყნებს წევრობის პროცესის დასრულების პერიოდში მიენიჭოთ დამკვირვებლის სტატუსი ევროკავშირის ინსტიტუტებში და უზრუნველყოფილ იქნას მათი შეზღუდული წვდომა კავშირის ერთიან ბაზარზე.

ესტონეთის პრემიერ-მინისტრმა კრისტენ მიხალმა მოლაპარაკებების შემდეგ გაკეთებულ განცხადებაში აღნიშნა, რომ კანდიდატი ქვეყნების მიმართ ნაკისრი ვალდებულებები უნდა შესრულდეს და დასძინა, რომ წინადადება განხილვის ღირსია.

მიხალმა განაცხადა, რომ რეფორმებისა და წევრობის პროცესის ფარგლებში შესრულებული სამუშაოს კონკრეტული შედეგების დანახვა კანდიდატი ქვეყნების მოტივაციას გაზრდის.

აზრთა თანხვედრა გაფართოების პროცესის უფრო სწრაფად წარმართვისთვის

დასავლეთ ბალკანეთში ალბანეთი, ბოსნია და ჰერცეგოვინა, მონტენეგრო, ჩრდილოეთ მაკედონია და სერბეთი დიდი ხანია აწარმოებენ მოლაპარაკებებს ევროკავშირის წევრობის შესახებ. გუშინდელ სამიტზე ლიდერების შეხვედრაზე ასევე შედგა აზრთა თანხვედრა იმის შესახებ, რომ გაფართოების პროცესი უფრო სწრაფად უნდა წარიმართოს.

შეხვედრის მასპინძელმა მონტენეგრომ კი განაცხადა, რომ არ სურს ჩართვა ინტეგრაციის ისეთ მოდელში, რომელსაც სრულუფლებიან წევრობაზე დაბალი სტატუსი ექნება.

მეორე მხრივ, ზოგიერთი კანდიდატი ქვეყანა დადებითად უყურებს სრულ წევრობამდე ეკონომიკური უპირატესობებით სარგებლობის იდეას. ალბანეთის პრემიერ-მინისტრმა ედი რამამ ადრე გაკეთებულ განცხადებაში ეტაპობრივი ინტეგრაციის მიდგომა „კარგ იდეად“ შეაფასა.