ერდოღანმა კიდევ ერთხელ დაადასტურა თურქეთის ერთგულება პალესტინაში ძალადობის შეწყვეტისა და რუსეთ-უკრაინის ომის სამართლიანი დასრულების საკითხებში.
თურქეთის რესპუბლიკის პრეზიდენტმა, რეჯეფ თაიფ ერდოღანმა, ყურბან ბაირამის დღესასწაულთან დაკავშირებით მსოფლიო მუსლიმებს მიულოცა ეს დღესასწაული და პალესტინელი ხალხისა და კონფლიქტებით დაზარალებულ სხვა თემებთან სოლიდარობის გზავნილი გააკეთა.
ერდოღანმა ყურბან ბაირამთან დაკავშირებით გავრცელებულ ვიდეომიმართვაში განაცხადა: „ღაზასა და ოკუპირებულ ტერიტორიებზე ეპიკურ ბრძოლაში მყოფ, ისრაელის ყველა ბარბაროსობის პირისპირ ღირსეულ წინააღმდეგობაში მყოფ ჩვენს პალესტინელ ძმებს ჩემი ქვეყნისა და ერის სახელით პატივისცემით ვესალმები და ყურბან ბაირამს გულითადად ვულოცავ“.
მან ასევე პატივი მიაგო ღაზაში დაღუპულთა ხსოვნას და თქვა: „თავდასხმების შედეგად დაღუპულ ყველა ღაზელ ძმას ღვთის წყალობას ვუსურვებ, ხოლო დაჭრილებს – მალე გამოჯანმრთელებას“.
პრეზიდენტმა ერდოღანმა იმედი გამოთქვა, რომ ღაზას, სუდანისა და სომალის მსგავს კონფლიქტურ რეგიონებში არასტაბილურობა რაც შეიძლება მალე დასრულდება.
„სისხლიანი ომის დასრულებისკენ გადადგმული ისტორიული ნაბიჯი“
ერდოღანმა ხაზი გაუსვა თურქეთის მტკიცე გადაწყვეტილებას პალესტინაში ძალადობის შეწყვეტის საკითხში და განაცხადა: „როგორც პალესტინაში გენოციდის შეჩერების, ასევე რუსეთ-უკრაინის ომის სამართლიანი მშვიდობით დასრულებისთვის, ყველანაირ ძალისხმევას ვიჩენთ“.
დიპლომატიურ ძალისხმევაზე ყურადღების გამახვილებისას, ერდოღანმა 2 ივნისს, ორშაბათს, სტამბოლში გამართულ შეხვედრაზე ისაუბრა და მას „მეოთხე წელში შესული სისხლიანი ომის დასრულებისკენ გადადგმული ისტორიული ნაბიჯი“ უწოდა.
მეზობელ სირიაზე საუბრისას, ერდოღანმა აღნიშნა, რომ თურქეთი მიესალმება ქვეყნის ახალი ადმინისტრაციის ძალისხმევას და მხარს უჭერს სირიის ეროვნული ერთიანობის, ტერიტორიული მთლიანობისა და გრძელვადიანი განვითარების მიზნებს.
პრეზიდენტმა ერდოღანმა თქვა: „რეგიონის ყველა მოძმე ქვეყნის მხარდაჭერით, გვჯერა, რომ სირია მუდმივ მშვიდობას მიაღწევს“.
