აშშ-ის პრეზიდენტმა დონალდ ტრამპმა განაცხადა, რომ აშშ-ის ცენტრალური ბანკის (FED) თავმჯდომარეობის კანდიდატს პარასკევს დაასახელებს.
ეს გადაწყვეტილება მოჰყვა აშშ-ის ცენტრალური ბანკის (FED) თავმჯდომარის, ჯერომ პაუელის მიმართ ერთ წელზე მეტი ხნის განმავლობაში გაჟღერებულ მწვავე კრიტიკას. პაუელის უფლებამოსილების ვადა მაისში იწურება.
ხუთშაბათს ტრამპმა ჟურნალისტებს განუცხადა: „თავმჯდომარეს ხვალ დილით დავასახელებ. ის იქნება ძალიან პატივსაცემი და ფინანსურ სამყაროში ყველასთვის ცნობილი პიროვნება“.
დონალდ ტრამპმა მიანიშნა, რომ კანდიდატი არის პირი, რომელიც „ამ თანამდებობაზე რამდენიმე წლის წინაც შეიძლებოდა დანიშნულიყო“, რითაც გააღვივა სპეკულაციები იმის შესახებ, რომ მან არჩევანი FED-ის ყოფილ მმართველზე, კევინ უორშზე შეაჩერა.
დაძაბულობა იზრდება იმ ფონზე, როდესაც აშშ-ის პრეზიდენტი ეკონომიკური ზრდის ხელშესაწყობად FED-ზე ახორციელებს ზეწოლას საპროცენტო განაკვეთების შემცირების მიზნით, თუმცა პაუელი ამ საკითხისადმი უფრო ფრთხილ მიდგომას იჩენს.
ამ თვეში, მას შემდეგ, რაც აშშ-ის პრეზიდენტმა ცენტრალური ბანკის შტაბ-ბინის რემონტის ხარჯები გააკრიტიკა, იუსტიციის დეპარტამენტმა FED-ს სასამართლო უწყება გაუგზავნა.
საპასუხოდ პაუელმა იშვიათი განცხადება გააკეთა: „სისხლისსამართლებრივი დევნის მუქარა არის შედეგი იმისა, რომ ცენტრალური ბანკი საპროცენტო განაკვეთებს საზოგადოების საუკეთესო ინტერესებიდან გამომდინარე ადგენს“.
ხაზინის მდივნის, სკოტ ბესენტის ხელმძღვანელობით კანდიდატის ძიების პროცესი ოთხ ადამიანამდე შემცირდა: კევინ უორში, კრისტოფერ უოლერი, რიკ კიდერი და კევინ ჰასეტი.
პაუელის თავმჯდომარეობის ვადა სამ თვეში იწურება, თუმცა მისი მმართველთა საბჭოს წევრობა 2028 წლამდე გრძელდება.
თუ ჯერომ პაუელი საბჭოში დარჩენას გადაწყვეტს, ამან შესაძლოა ხელი შეუშალოს ტრამპს ადგილების უმრავლესობის გაკონტროლებაში.
ოთხშაბათს გამართულ პრესკონფერენციაზე პაუელმა თავი აარიდა კომენტარის გაკეთებას იმის შესახებ, დარჩება თუ არა საბჭოში, თუმცა თავის მემკვიდრეს შემდეგი რჩევა მისცა: „ნუ ჩაერევით საარჩევნო პოლიტიკაში, ეს არავითარ შემთხვევაში არ გააკეთოთ“.
