გამოცემა Axios-თან საუბარში ანონიმურმა წყაროებმა რეტკლიფის მიერ გასულ კვირას რუსეთის დედაქალაქ მოსკოვში განხორციელებულ ვიზიტზე ისაუბრეს.
წყაროების მტკიცებით, რეტკლიფმა ტრამპს, პუტინსა და ზელენსკის შორის სამმხრივი შეხვედრის გამართვა შესთავაზა. მათივე თქმით, ამ ვიზიტის მიზანი იმის გარკვევა იყო, შეძლებდნენ თუ არა რუსეთის დაზვერვის მაღალჩინოსნები პუტინის დარწმუნებას, რათა აშშ-ის შუამავლობით უკრაინასთან მოლაპარაკებები განახლებულიყო.
წყაროები ირწმუნებიან, რომ რეტკლიფის შეფასებით, რუსეთის უსაფრთხოების ფედერალური სამსახურის (FSB) დირექტორი ალექსანდრ ბორტნიკოვი „კონსტრუქციული ფიგურაა, რომელიც დიპლომატიური ძალისხმევის განახლებას ხელს შეუწყობს“.
აშშ-ის პრეზიდენტმა ტრამპმა Axios-თან საუბარში განაცხადა, რომ რეტკლიფის ვიზიტი „სტანდარტული სამუშაო პროცესი იყო და არ ისახავდა მიზნად რუსეთის გაფრთხილებას ნატო-ს ტერიტორიაზე შესაძლო თავდასხმების შესახებ“.
გაზეთ The New York Times-ის მიერ მანამდე გავრცელებულ ინფორმაციაში კი აღნიშნული იყო, რომ მოსკოვში ვიზიტისას რეტკლიფმა ბორტნიკოვს მოუწოდა, რუსეთს უკრაინასთან შეთანხმებისთვის მიეღწია.
