საბერძნეთში ბაზირებულ გამოცემა Europost-ში ევროპული ქვეყნების მიერ უსაფრთხოებისა და თავდაცვის საკითხებში ანკარასთან თანამშრომლობის გაღრმავება საბერძნეთისთვის „ახალ და მკაცრ რეალობად“ შეფასდა.

ხაზგასმით აღინიშნა, რომ დონალდ ტრამპის ხელმძღვანელობით აშშ-ის ევროპისგან ეტაპობრივად დაშორების შედეგად წარმოქმნილ სიცარიელეს თურქეთი ავსებს. ამ ვითარებამ ევროპული ქვეყნების დედაქალაქებს ანკარასთან უფრო მჭიდრო თანამშრომლობისკენ უბიძგა და თურქეთის გეოპოლიტიკური პოზიცია ისე გააძლიერა, როგორც არასდროს.

თურქეთი ევროპის უსაფრთხოების მთავარ საყრდენად იქცა

როგორც თურქეთის ეროვნული თავდაცვის მინისტრმა იაშარ გიულერმაც განაცხადა, თურქეთი უკვე აღიქმება არა მხოლოდ რეგიონულ მოკავშირედ, არამედ ევროპის უსაფრთხოების საკვანძო აქტორად.

ანკარის სამხედრო ძალამ და დიპლომატიური მანევრირების უნარმა ევროკავშირსა და ნატოში არსებული ბალანსი შეცვალა. პრეზიდენტ ერდოღანის ხელმძღვანელობით, თურქეთი არის ერთადერთი „ხიდი ქვეყანა“, რომელსაც შეუძლია დიალოგის წარმართვა როგორც დასავლეთთან, ისე რუსეთთან და ირანთან, რამაც გაამყარა მისი შუამავლის როლი საერთაშორისო კრიზისებში.

როგორც უკრაინის ლიდერმა ზელენსკიმ აღიარა, თურქეთის დამაბალანსებელმა როლმა რეგიონში ევროპისთვის სასიცოცხლო მნიშვნელობა შეიძინა.

უპილოტო საფრენი აპარატების ტექნოლოგიამ და Eurofighter-ის ნაბიჯმა ბალანსი შეცვალა

თურქეთის თავდაცვის ინდუსტრიის წინსვლამ და განსაკუთრებით Bayraktar TB2-ის მსგავსი უპილოტო საფრენი აპარატების წარმატებამ საბრძოლო ველზე, გავლენა მოახდინა ევროპის ტექნოლოგიურ არჩევანზე.

ევროკომისიის პრეზიდენტის, ურსულა ფონ დერ ლაიენის მიერ წამოწყებულ პროექტში „ევროპული უპილოტო საფრენი აპარატების კედელი“ (European drone wall), თურქეთის პოტენციური პარტნიორობა ათენში შეშფოთებით იქნა მიღებული.

დიდი ბრიტანეთის პრემიერ-მინისტრის, კირ სტარმერის მიერ მხარდაჭერილი Eurofighter-ის გამანადგურებლების მიყიდვის პროცესი და თურქეთის შეუცვლელობა მიგრაციის, ენერგეტიკისა და უსაფრთხოების საკითხებში განიხილება, როგორც ფაქტორები, რომლებიც საბერძნეთს ეგეოსისა და აღმოსავლეთ ხმელთაშუა ზღვისპირეთში საკუთარი პოზიციების დაცვას ურთულებს.

ათენისთვის რთული პერიოდი დაიწყო

ბერძნული მედიის ანალიზებში აღნიშნულია, რომ ევროპის თავდაცვის ავტონომიის ძიების პროცესში ისეთი ქვეყნების მიერ, როგორებიცაა საფრანგეთი, გერმანია და დიდი ბრიტანეთი, ანკარასთან სტრატეგიული პარტნიორობის დამყარებამ შესაძლოა ათენის მოლაპარაკების ძალა შეასუსტოს.

რეგიონში ბალანსის თურქეთის სასარგებლოდ სწრაფმა ცვლილებამ საბერძნეთისთვის უფრო ფრთხილი და სტრატეგიული ნაბიჯების გადადგმა გახადა აუცილებელი.