უკრაინის დელეგაცია 17–18 თებერვალს, რუსეთთან ამერიკის შეერთებული შტატების შუამავლობით დაგეგმილი სამშვიდობო მოლაპარაკებების მორიგი რაუნდისთვის ჟენევაში გაემგზავრა. ამის შესახებ განცხადება უკრაინის პრეზიდენტის ოფისის ხელმძღვანელმა, კირილო ბუდანოვმა გააკეთა.
ორშაბათს ბუდანოვმა „ტელეგრამის“ მეშვეობით გამოაქვეყნა ფოტო, სადაც ის და დელეგაციის ორი წევრი მატარებლის ვაგონის წინ არიან გადაღებული და აღნიშნა: „ჟენევაში მივდივართ. მოლაპარაკებების შემდეგი რაუნდი გველოდება. გზაში კოლეგებთან ერთად ჩვენი ისტორიიდან გამოტანილ გაკვეთილებს განვიხილავთ და ვეცდებით სწორი დასკვნები გამოვიტანოთ. უკრაინის ინტერესები დაცული უნდა იყოს“.
წელს რუსეთის, უკრაინისა და აშშ-ის მონაწილეობით გამართული უსაფრთხოების შესახებ სამმხრივი კონსულტაციების პირველი რაუნდი 23-24 იანვარს არაბთა გაერთიანებული საამიროების დედაქალაქ აბუ-დაბიში გაიმართა. ამ შეხვედრებზე მოსკოვის დელეგაციას რუსეთის ფედერაციის შეიარაღებული ძალების გენერალური შტაბის მთავარი სადაზვერვო სამმართველოს უფროსი, იგორ კოსტიუკოვი ხელმძღვანელობდა.
მეორე რაუნდი კი 4-5 თებერვალს იმავე ადგილას ჩატარდა.
კრემლის პრესსპიკერმა, დიმიტრი პესკოვმა გასულ კვირას გაკეთებულ განცხადებაში აღნიშნა, რომ უკრაინის კონფლიქტის მოგვარების პროცესთან დაკავშირებული მოლაპარაკებების შემდეგი რაუნდი კვლავ რუსეთი-აშშ-უკრაინის სამმხრივ ფორმატში წარიმართებოდა და შეხვედრები 17–18 თებერვალს შვეიცარიის ქალაქ ჟენევაში გაიმართებოდა.
