მეტეოროლოგიის მსოფლიო ორგანიზაცია (WMO) ვარაუდობს, რომ „ელ-ნინიოს“ გაძლიერებასთან ერთად მსოფლიოს მრავალ რეგიონში გაიზრდება სიცხის ტალღების, გვალვების, ძლიერი ნალექებისა და ექსტრემალური ამინდის მოვლენების რისკი.

WMO-მ გამოაქვეყნა ახალი ანგარიში გლობალური სეზონური კლიმატის ყოველთვიური განახლების შესახებ.

ანგარიშში ნათქვამია: „ტროპიკულ წყნარ ოკეანეში „ელ-ნინიოს“ პირობები ჩამოყალიბდა და მომდევნო თვეებში მოსალოდნელია მისი სწრაფი გაძლიერება. ეს ზრდის სიცხის ტალღების, გვალვების, ძლიერი ნალექებისა და სხვა ექსტრემალური ამინდის მოვლენების ალბათობას მსოფლიოს მრავალ რეგიონში“.

ანგარიში მიუთითებს „ელ-ნინიოს“ პირობების სწრაფ განვითარებაზე 2026 წლის ივლისი-სექტემბრის პერიოდში და აღნიშნავს ოკეანის წყლის ტემპერატურის თანმიმდევრულ დათბობას ცენტრალურ და აღმოსავლეთ ეკვატორულ წყნარ ოკეანეში.

„მოსალოდნელია, რომ „ელ-ნინიო“ გაძლიერებას განაგრძობს ჩრდილოეთ ნახევარსფეროს შემოდგომის განმავლობაში და მისი გავლენა მსოფლიოს მრავალ რეგიონში გავრცელდება“, - ნათქვამია დოკუმენტში.

ასევე აღინიშნა, რომ ეკვატორული ატლანტიკის აუზი, როგორც წესი, საშუალოზე თბილი დარჩება.

ანგარიშში მოყვანილია WMO-ს გენერალური მდივნის, სელესტე საულოს სიტყვები, რომელმაც გააფრთხილა, რომ „ელ-ნინიოს“ პირობები უკვე დაწყებულია და მოსალოდნელია მათი სწრაფი გადაზრდა მძლავრ მოვლენაში.

„ეს გაზრდის გვალვისა და ჭარბი ნალექის ალბათობას, ასევე სიცხის ტალღების რისკს ხმელეთსა და ზღვაზე მსოფლიოს მრავალ კუთხეში“, - განაცხადა საულომ.

El Niño და La Niña ამინდის მოვლენები

წყნარ ოკეანეში „ელ-ნინიოს“ მოვლენა ტემპერატურის მატებას იწვევს განსაკუთრებით ოკეანისპირა რეგიონებში და ზოგადად მთელ მსოფლიოში.

ამის საპირისპირო მოვლენა - „ლა-ნინია“ (La Niña) კი მსოფლიოსთვის შედარებით ცივ ამინდებს ნიშნავს.

„ელ-ნინიოსა“ და „ლა-ნინიას“ შორის გარდამავალ პერიოდში ნეიტრალური, ანუ ბუნებრივი ამინდის მოვლენები ჭარბობს.