ჩინეთის მთავრობა შობადობის მაჩვენებლის გაზრდას მიზნად ისახავს ეროვნული მშობელთა სუბსიდიების ამოქმედებით, რომელიც სხვადასხვა პროვინციულ გეგმას ჩაანაცვლებს ხარჯების შემცირების მიზნით.
ორშაბათს, ჩინეთმა სამ წლამდე ასაკის ბავშვებისთვის ყოველწლიური, 3,600 იუანის (502 დოლარი) ოდენობის ბავშვის მოვლის დახმარების პროგრამა აამოქმედა. ხელისუფლების მიზანი შობადობის კლებადი მაჩვენებლის გაზრდაა.
ხელისუფლება შეშფოთებულია იმით, რომ ახალგაზრდები ბავშვის გაჩენას აღარ ამჯობინებენ და ასაკოვანი მოსახლეობა იზრდება. ბავშვის მოვლისა და განათლების მაღალი ღირებულება, დასაქმების გაურკვევლობა და ეკონომიკური სტაგნაცია იმ ფაქტორებს შორისაა, რომლებიც ბევრ ახალგაზრდას ქორწინებისა და ოჯახის შექმნისგან თავის შეკავებისკენ უბიძგებს.
ოფიციალური საინფორმაციო სააგენტო Xinhua-ს თანახმად, აღნიშნული დახმარება რეტროაქტიულად, ამ წლის დასაწყისიდან ამოქმედდება და ნაწილობრივ მიეწოდება 2025 წლამდე დაბადებულ სამ წლამდე ასაკის ბავშვებს. მოსალოდნელია, რომ ეს პოლიტიკა 20 მილიონზე მეტ ოჯახს მოუტანს სარგებელს, რომლებსაც ჩვილი და მცირეწლოვანი ბავშვები ჰყავთ.
ჯანდაცვის ეროვნულმა კომისიამ განაცხადა, რომ გეგმა "მნიშვნელოვანი ეროვნული სასიცოცხლო პოლიტიკაა" და პირდაპირი ფულადი დახმარება "ოჯახებს მშობიარობისა და აღზრდის ხარჯების შემცირებაში" დაეხმარება.
2024 წლის ბოლოსთვის ჩინეთში 60 წლისა და უფროსი ასაკის 310 მილიონი ადამიანი იყო. ჩინეთის საერთო მოსახლეობა, Worldometer-ის შეფასებით, რომელიც გაეროს უახლეს მონაცემებს ეფუძნება, დაახლოებით 1,41 მილიარდს შეადგენს.
მოსახლეობის კლება
2024 წელს ჩინეთის მოსახლეობა ზედიზედ მესამედ შემცირდა, ხოლო ექსპერტები აფრთხილებენ, რომ კრიზისი კიდევ უფრო გაუარესდება, რადგან შობადობის მაჩვენებელი 1980 წლიდან 2015 წლამდე გატარებული ერთი შვილის პოლიტიკისა და სწრაფი ურბანიზაციის გამო დაეცა.
ბოლო ორი წლის განმავლობაში, ქვეყნის მასშტაბით, პროვინციებმა ბავშვის მოვლის დახმარების გაცემა დაიწყეს. ეს დახმარებები თითო ბავშვზე 1,000 იუანიდან (139 დოლარი) 100,000 იუანამდე (13,931 დოლარი) მერყეობს და საბინაო დახმარებასაც მოიცავს.
Xinhua-ს თანახმად, ახალი ეროვნული პოლიტიკა ადგილობრივი მთავრობების ნაცვლად ცენტრალური მთავრობის მიერ დაფინანსდება.
ჩინეთში ჩატარებული კვლევის თანახმად, ქვეყანაში ბავშვის აღზრდა, შემოსავლის დონესთან შედარებით, მსოფლიოში ერთ-ერთი ყველაზე ძვირადღირებულია.
ხელისუფლებამ 2024 წელს, იმ გამოწვევებთან გასამკლავებლად, რომელსაც მომდევნო ათი წლის განმავლობაში საპენსიო ასაკს მიღწეული დაახლოებით 300 მილიონი ადამიანი (თითქმის აშშ-ის მთლიანი მოსახლეობის ექვივალენტი) შექმნის, „შობადობის ხელშემწყობი“ ღონისძიებების სერია გამოაცხადა.
