ტრამპი: აშშ-მა ირანის ხარგის კუნძულზე მასშტაბური დაბომბვა განახორციელა

ტრამპმა შაბათს გამთენიისას სოციალური ქსელის მეშვეობით გაკეთებულ განცხადებაში აღნიშნა, რომ აშშ-ის არმიამ ირანის ხარგის კუნძულზე მასშტაბური იერიში მიიტანა და გააფრთხილა, რომ ჰორმუზის სრუტეში გემების გადაადგილების შეფერხების შემთხვევაში, ირანის ნავთობის ინფრასტრუქტურაც შეიძლება გახდეს სამიზნე.

მან თქვა: „აშშ-ის ცენტრალურმა სარდლობამ ახლო აღმოსავლეთის ისტორიაში ერთ-ერთი ყველაზე ძლიერი დაბომბვის ოპერაცია განახორციელა და სრულიად გაანადგურა ყველა სამხედრო სამიზნე ხარგის კუნძულზე, რომელიც ირანის თვალისჩინად ითვლება“.

ტრამპმა აღნიშნა, რომ ამჯობინა კუნძულზე არსებული ნავთობის ინფრასტრუქტურა სამიზნეში არ ამოეღო, თუმცა დასძინა, რომ თუ ირანი ან რომელიმე სხვა მხარე ჩაერევა ჰორმუზის სრუტეში გემების თავისუფალ და უსაფრთხო გადაადგილებაში, იგი ამ გადაწყვეტილებას გადახედავს.

სტრატეგიული კუნძული

მიუხედავად იმისა, რომ აშშ და ისრაელი დღემდე ფრთხილობდნენ ხარგის კუნძულთან დაკავშირებით, გავრცელებული ინფორმაციით, ტრამპის ადმინისტრაციის ზოგიერთმა წარმომადგენელმა განაცხადა, რომ ახლო აღმოსავლეთში აშშ-ისრაელის ომის გაგრძელების ფონზე, კუნძულის დაკავებაც ერთ-ერთ ვარიანტად განიხილება.

კუნძული, რომელიც ირანის მატერიკიდან დაახლოებით 30 კილომეტრითაა დაშორებული, JP Morgan-ის ბოლო მონაცემებით, ირანის ნედლი ნავთობის ექსპორტის დაახლოებით 90%-ს უზრუნველყოფს.

აღინიშნება, რომ ნებისმიერ სამხედრო ნაბიჯს კუნძულზე, რომელიც მანჰეტენის დაახლოებით მესამედი ზომისაა, შესაძლოა ძალიან სწრაფი და ფართომასშტაბიანი შედეგები მოჰყვეს.

ირანის თავდასხმებმა თითქმის შეაჩერა საზღვაო მიმოსვლა ჰორმუზის სრუტეში, სადაც მსოფლიო ნედლი ნავთობისა და გათხევადებული ბუნებრივი აირის დაახლოებით მეხუთედი გადის. თავდასხმებმა ასევე გავლენა მოახდინა ყურის სხვა ქვეყნების ნავთობის ინფრასტრუქტურაზეც.

ტრამპმა განაცხადა, რომ იმ პერიოდში, როდესაც ის ცდილობს ებრძოლოს საწვავის გაძვირებულ ფასებს, აშშ-ის სამხედრო-საზღვაო ფლოტი ძალიან მალე დაიწყებს ტანკერების დაცვას სრუტეში გავლისას ნავთობის ექსპორტის აღსადგენად.

ხარგის კუნძულმა სტრატეგიული მნიშვნელობა 1960-იან და 1970-იან წლებში შეიძინა, როდესაც ირანმა ნავთობის მოპოვება გააფართოვა. იმის გამო, რომ ქვეყნის სანაპიროების უდიდესი ნაწილი სუპერტანკერებისთვის ზედმეტად წყალმარჩხია, კუნძული ნავთობის ექსპორტის ერთ-ერთ მთავარ ცენტრად იქცა.