ავსტრალიის პრემიერ-მინისტრმა ენტონი ალბანეზიმ ჩინეთსა და აშშ-ს მიმართა გზავნილით: „ინდო-წყნარი ოკეანის რეგიონი არ არის საჭადრაკო დაფა, სადაც ზესახელმწიფოები ფიგურებს გადააადგილებენ“.
ABC News-ის ცნობით, ალბანეზიმ ეს განცხადება ნიუ-იორკში, „ატლანტიკური საბჭოს“ გალა ვახშამზე გამოსვლისას გააკეთა, სადაც მან თავისი ქვეყნის საგარეო პოლიტიკა შეაფასა.
ალბანეზიმ აღნიშნა, რომ ავსტრალიამ ახალი ურთიერთობების დამყარებით, ქვეყნებს შორის ურთიერთქმედების წესების დაცვით და „ძლიერის სიმართლის“ იდეის უარყოფით, წვლილი უნდა შეიტანოს ახალი გლობალური წესრიგის ჩამოყალიბებაში. მან ხაზი გაუსვა, რომ ჩინეთსა და აშშ-ს შორის კონკურენცია რეგიონის განმსაზღვრელი უმთავრესი ფაქტორია.
ამ კონტექსტში ჩინეთისა და აშშ-ის მისამართით გაკეთებულ გზავნილში ალბანეზიმ განაცხადა: „ინდო-წყნარი ოკეანის რეგიონი არ არის საჭადრაკო დაფა, სადაც ზესახელმწიფოები ფიგურებს გადააადგილებენ“.
იმის აღნიშვნით, რომ უაღრესად მნიშვნელოვანია, თუ როგორ მართავენ ვაშინგტონი და პეკინი ურთიერთობებს, ალბანეზიმ დასძინა: „თუმცა, ეს არ შეიძლება იყოს რეგიონისადმი ჩვენი ხედვის ერთადერთი პრიზმა. რეგიონის ქვეყნები მაყურებლები არ არიან. ისინი თავად აყალიბებენ რეგიონის მომავალს და საკუთარ სცენარებს წერენ“.
