ორი ქალი, რომელიც ისრაელელი თაღლითის, სიმონ ლევიევის მსხვერპლი გახდა (რომელიც ცნობილია Netflix-ის ცნობილი დოკუმენტური ფილმით "თინდერის თაღლითი"), აცხადებს, რომ შვება იგრძნეს, როდესაც გაიგეს ლევიევის დაკავების შესახებ საქართველოში.

34 წლის ლევიევმა, რომლის ნამდვილი სახელია შიმონ იეჰუდა ჰაიუტი, პოპულარობა რომანტიკული თაღლითობით და ფინანსური დანაშაულებებით მოიპოვა, რომლებიც მედიის გამოძიებებით გამოვლინდა.

საქართველოს ხელისუფლებამ ორშაბათს განაცხადა, რომ იგი ბათუმის აეროპორტში ინტერპოლის მოთხოვნით დააკავეს.

შვედმა მსხვერპლმა, პერნილა შოჰოლმმა, სტოკჰოლმში AFP-ს სააგენტოსთან საუბრისას თქვა: "გუშინ ცოტა ვიზეიმე. ბედნიერად ყოფნის უფლება მაქვს, რადგან ამ ადამიანმა ჩემი ცხოვრება გაანადგურა".

ნორვეგიელმა მსხვერპლმა, სესილიე ფიელჰოიმ კი განაცხადა, რომ ხანგრძლივი ლოდინის შემდეგ მომხდარნმა დაკავებამ შოკში ჩააგდო. ლონდონში AFP-სთან საუბრისას ფიელჰოიმ სიტუაცია "პატარა ზეიმს" შეადარა და აღნიშნა, რომ მიუხედავად პროცესის ხანგრძლივობისა, თავს "ძალიან მშვიდად" გრძნობს.

ვარაუდობენ, რომ ლევიევი 2017-2019 წლებში, Tinder-ის გაცნობის აპლიკაციაში, მდიდარ მემკვიდრედ ასაღებდა თავს და ქალებს ატყუებდა, რათა დიდი ოდენობით სესხი აეღო, რომელსაც არასდროს უბრუნებდა.

ლევიევის გეგმა გახდა "ქეთფიშინგის" (catfishing) ერთ-ერთი ყველაზე სამარცხვინო მაგალითი, რაც გულისხმობს ყალბი ონლაინ პირადობის შექმნას მსხვერპლის მატერიალურ და ემოციურ ხაფანგში მოსაქცევად.

ფიელჰოიმ განაცხადა, რომ ლევიევის დაკავებამ "გარკვეული სიმშვიდე მოუტანა", და აღნიშნა: "რადგან ვიცი, რომ ახლა დაცული ვარ. ასევე ვიცი, რომ მომავალი მსხვერპლები დაცულები არიან. მაგრამ მაღიზიანებს, რომ ამდენი დრო დასჭირდა და, რამდენადაც ჩვენ ვიცით, ამდენი მსხვერპლი დაგროვდა".

შოჰოლმმა, რომელიც ლევიევს 2018 წლის მარტში შეხვდა Tinder-ზე, თქვა, რომ რამდენიმე თვეში მოატყუეს. მან ხაზგასმით აღნიშნა, რომ ჯამში 65 000 დოლარზე მეტი გადაიხადა და ეს თანხა არასდროს დაბრუნებულა.

მან მადლობა გადაუხადა ქვეყანას, რომელმაც საერთაშორისო დაპატიმრების ორდერი გასცა და თქვა: "მისი დაკავება გამარჯვებაა".

ამჟამად 38 წლის შოჰოლმმა განაცხადა, რომ ცხოვრებას ხელახლა აშენებს და აღნიშნა: "2018 და 2019 წლებში ძალიან განადგურებული ვიყავი. წარმოუდგენელია, რომ დღეს აქ ვდგავარ და ასეთი ბედნიერი ვარ". მან თავისი ამჟამინდელი ოჯახური ცხოვრება "ძალიან ბედნიერად" შეაფასა.

შოჰოლმმა აღნიშნა, რომ მას შემდეგ ფინანსური თაღლითობის წინააღმდეგ ბრძოლის კამპანიებში ჩაერთო და ხელოვნური ინტელექტისა და deepfake-ს ტექნოლოგიებზე უფრო მკაცრი რეგულაციების დაწესებისკენ მოუწოდა. "თაღლითობა მხოლოდ ფულის დაკარგვად არ უნდა მივიჩნიოთ. ეს ასევე უნდა განვიხილოთ, როგორც ემოციური ძალადობა, რომელსაც მსხვერპლები განიცდიან", - განაცხადა მან.

გარდა ამისა, მან დასძინა, რომ მზად არის მის წინააღმდეგ ჩვენება მისცეს სასამართლო პროცესის შემთხვევაში.