პუტინი: რუსეთმა უპირატესობა მოიპოვა უკრაინაში „სამართლიან ომში“

რუსეთის პრეზიდენტმა ვლადიმერ პუტინმა განაცხადა, რომ რუსეთმა უპირატესობა მოიპოვა უკრაინაში მიმდინარე ომში, რომელსაც ის „სამართლიან ბრძოლად“ მოიხსენიებს.

პუტინმა კრემლის ვებსაიტზე ორშაბათს გამოქვეყნებულ ვიდეოში განაცხადა: „ჩვენი მებრძოლები და მეთაურები შეტევაზე არიან, და მთელი ქვეყანა, მთელი რუსეთი აწარმოებს ამ სამართლიან ბრძოლას და დიდ ძალისხმევას დებს“, – თქვა მან და სასძინა: „ერთად ვიცავთ სამშობლოს სიყვარულს და ჩვენი ისტორიული ბედის ერთიანობას, ვიბრძვით და ვიმარჯვებთ“.

მიუხედავად აშშ-ის პრეზიდენტ დონალდ ტრამპის დიპლომატიური ძალისხმევისა, მათ შორის ცალკეული სამიტებისა პუტინთან, უკრაინის პრეზიდენტ ვოლოდიმირ ზელენსკისთან და სხვა ევროპელ ლიდერებთან კონფლიქტის დასასრულებლად, ომის დასასრულის ნიშნები არ ჩანს.

ღია წყაროების ომის რუკების მიხედვით, რუსეთი აკონტროლებს უკრაინის აღმოსავლეთ და სამხრეთ-აღმოსავლეთ ნაწილში დაახლოებით 114,500 კვადრატულ კილომეტრს, ანუ 19%-ს, ყირიმის ჩათვლით.

ტრამპმა, თავისი წინა პოზიციის საპირისპიროდ, გასულ კვირას განაცხადა, რომ უკრაინას აქვს შანსი დაიბრუნოს თავისი ტერიტორიები, ხოლო ვაშინგტონმა ასევე განაცხადა, რომ განიხილავს კიევის მოთხოვნას Tomahawk-ის საკრუიზო რაკეტებზე რუსეთის სიღრმეში თავდასხმების განსახორციელებლად.

დამატებითი მიღწევები დონეცკში

ბრძოლის ველზე განვითარებულ მოვლენებთან დაკავშირებით, რუსეთის თავდაცვის სამინისტრომ განაცხადა, რომ რუსულმა ძალებმა კონტროლი მოიპოვეს აღმოსავლეთ უკრაინის დონეცკის რეგიონში ორ ფრონტისპირა დასახლებაზე.

უკრაინის ხელისუფლებას არ უხსენებია რუსეთის განცხადება ამ ორი სოფლის შესახებ, ხოლო ზელენსკიმ განაცხადა, რომ კიევის კონტრშეტევა დონეცკის რეგიონის ქალაქ დობროპილიას მახლობლად წარმატებით მიმდინარეობს.

რუსეთის თავდაცვის სამინისტრომ განაცხადა, რომ შანდრიჰოლოვი და ზარიჩნე, რომლებიც სლოვიანსკის ჩრდილო-აღმოსავლეთით მდებარეობს – მოსკოვის მიერ დონეცკის რეგიონის გავლით დასავლეთისკენ წინსვლის ერთ-ერთი ცენტრის, ახლა მათ კონტროლქვეშაა.

მოგვიანებით სამინისტრომ მეორე განცხადება გაავრცელა, სადაც ნათქვამია, რომ თავდაცვის მინისტრმა ანდრეი ბელუსოვმა მიულოცა სამხედრო შენაერთს „მამაცი და გადამწყვეტი“ მოქმედებებისთვის, რამაც გამოიწვია ზარიჩნეს – რომელიც ცნობილია საბჭოთა პერიოდის სახელით კიროვსკი – აღება.

რუსეთის თავდაცვის სამინისტროს მიერ გავრცელებული ვიდეო გვიჩვენებს, თუ როგორ მიიწევენ რუსი ჯარისკაცები შენობა-შენობა და აღმართავენ რუსულ დროშას შანდრიჰოლოვის კონტროლის დამყარებისას.