აშშ-ში მოქმედმა უფლებადამცველმა ორგანიზაციამ ხუთშაბათს გაკეთებულ განცხადებაში აღნიშნა, რომ ირანში მიმდინარე საპროტესტო აქციების დროს დაღუპულთა რიცხვმა 2 677-ს მიაღწია.
HRANA-ს ცნობით, მძიმე ეკონომიკური პირობებით გამოწვეული უკმაყოფილების ნიადაგზე დაწყებული და დღემდე მიმდინარე აქციების ფარგლებში, 19 097 ადამიანი იქნა დაკავებული.
ირანის ხელისუფლებას საპროტესტო აქციების დროს დაღუპულთა ან დაშავებულთა საერთო რაოდენობის შესახებ ოფიციალური განცხადება ჯერჯერობით არ გაუკეთებია.
საპროტესტო აქციები 28 დეკემბერს დედაქალაქ თეირანში დაიწყო, როდესაც ხელოსნებმა, ვაჭრებმა და მცირე ბიზნესის მფლობელებმა მზარდი ინფლაცია, რიალის (ადგილობრივი ვალუტა) გაუფასურება და გაუარესებული ეკონომიკური პირობები გაფიცვებითა და დემონსტრაციებით გააპროტესტეს.
გამოსვლები მალე ბევრ სხვა ქალაქშიც გავრცელდა და მუშების, სტუდენტებისა და საზოგადოების სხვადასხვა ფენების ჩართულობით, ანტისამთავრობო ხასიათი მიიღო.
