სამშაბათს პარლამენტში წარდგენილი „მიგრაციისა და თავშესაფრის შესახებ“ ახალი კანონპროექტის ფარგლებში, ეს რეგულაცია ავალდებულებს სრულწლოვან პირებს, რომლებმაც მიაღწიეს საკმარის შემოსავალს, აღნიშნული თანხა განვადებით გადაიხადონ.

ეს დავალიანება, რომელიც ეხება ბრიტანეთში მუშაობის უფლების მქონე თავშესაფრის მაძიებლებს, სრულად უნდა დაიფაროს მანამ, სანამ პირი ქვეყანაში მუდმივი ბინადრობის უფლებას მოიპოვებს.

შინაგან საქმეთა მინისტრმა, შაბანა მაჰმუდმა განაცხადა, რომ თავშესაფრის მხარდაჭერა, გარდა იმისა, რომ უფლებაა, ასევე პასუხისმგებლობასაც აკისრებს პირებს. მისი თქმით, ისინი მოელიან, რომ როდესაც ადამიანები შეძლებენ წვლილის შეტანას, მათ ბრიტანელი ხალხის გულუხვობის საფასური უნდა გადაიხადონ.

კანონპროექტის თანახმად, ეს ხარჯები იმ პირებისგანაც იქნება ამოღებული, რომელთაც თავშესაფრის მოთხოვნა უარყოფილ იქნა, მაგრამ ქვეყანაში დარჩნენ, თუ მათი შემოსავალი დადგენილ ზღვარს მიაღწევს.

შინაგან საქმეთა სამინისტროს მონაცემებით, გასულ წელს ქვეყანაში თავშესაფრის მაძიებელთა მხარდასაჭერად დაახლოებით 4 მილიარდი გირვანქა სტერლინგი დაიხარჯა.

სამოქალაქო საზოგადოების ორგანიზაციებმა, როგორიცაა „ლტოლვილთა საბჭო“ (Refugee Council), ეს გეგმა ლტოლვილებისთვის დაწესებულ დამატებით გადასახადად შეაფასეს და უსამართლოდ მიიჩნიეს. ოქსფორდის უნივერსიტეტის მიგრაციის მონიტორინგის ცენტრის (Migration Observatory) ექსპერტები კი აღნიშნავენ, რომ ლტოლვილებს შორის დასაქმების დაბალი მაჩვენებლის გამო, მთავრობას გაუჭირდება დაგეგმილი შემოსავლის მიღება.

ოპოზიციური „კონსერვატიული პარტია“ კი ამტკიცებს, რომ „ლეიბორისტული პარტიის“ მთავრობამ ეს პოლიტიკა მათგან გადააკოპირა.