აშშ-ის ტრანსპორტის მინისტრმა შონ დაფიმ განაცხადა, რომ ფლორიდის შტატში, დასახლებულ პუნქტში ჩამოვარდნილ კერძო თვითმფრინავში მყოფი ცხრავე მგზავრი დაიღუპა.
შონ დაფიმ სოციალურ ქსელში გავრცელებულ განცხადებაში ფლორიდის შტატის პალმ-ბიჩის რაიონში „Learjet 60“ ტიპის კერძო თვითმფრინავის ჩამოვარდნის შესახებ ისაუბრა.
მინისტრის ინფორმაციით, თვითმფრინავი ტეხასის შტატის ქალაქ ოსტინიდან ბაჰამის კუნძულების მიმართულებით გაფრინდა. ბორტზე მყოფი ცხრავე ადამიანი დაიღუპა. დაფიმ ასევე აღნიშნა, რომ შემთხვევის ადგილზე შესაბამისი სამსახურების ჯგუფები გაგზავნეს.
ფლორიდის გუბერნატორმა რონ დესანტისმა განაცხადა, რომ თვითმფრინავის ჩამოვარდნამ ადგილობრივ ინფრასტრუქტურას სერიოზული ზიანი მიაყენა და შესაძლოა, ზოგიერთი გზა დიდი ხნის განმავლობაში დაკეტილი დარჩეს.
CNN-ის ინფორმაციით, ვებსაიტმა, რომელიც საჰაერო მოძრაობის კონტროლის რადიოკავშირების ჩანაწერებს ინახავს, გაავრცელა ინფორმაცია, რომ ავარიამდე რამდენიმე წუთით ადრე პილოტმა განაცხადა თვითმფრინავზე ყინულის დაგროვების შესახებ. მისი თქმით, გარე ჰაერის ტემპერატურა მინუს 47 გრადუსი იყო, ხოლო საშუალო ინტენსივობის ტურბულენცია თვითმფრინავს არყევდა.
სოციალურ ქსელებში გავრცელებულ ვიდეოში ჩანს, როგორ ეჯახება თვითმფრინავი მიწას, რასაც ძლიერი აფეთქება და ცეცხლის დიდი ალი მოჰყვება.
