ევროპის რამდენიმე ქვეყანამ მოუწოდა თავის მოქალაქეებს დატოვონ ირანი, უსაფრთხოების მდგომარეობის გაუარესების გამო, რაც გამოწვეულია როგორც ანტისამთავრობო, ისე სამთავრობო მხარდამჭერი პროტესტების გაგრძელებით და აშშ-ის მხრიდან ირანზე შესაძლო თავდასხმების შესახებ მზარდი შეშფოთებით.
ოთხშაბათს, ესპანეთის საგარეო საქმეთა სამინისტრომ მოქალაქეებს ქვეყნის დატოვება ურჩია და ქვეყნის მასშტაბით არსებულ არასტაბილურ ვითარებაზე გაამახვილა ყურადღება. განახლებულ სამგზავრო გაფრთხილებაში ნათქვამია: „ირანში მყოფ ესპანეთის მოქალაქეებს ვურჩევთ, დატოვონ ქვეყანა არსებული საშუალებების გამოყენებით. ქვეყნის მასშტაბით ვითარება არასტაბილურია. სხვადასხვა წყაროების თანახმად, ვრცელდება ინფორმაცია ზოგიერთი მომიტინგის დაღუპვისა და დაპატიმრებების შესახებ“.
იტალიამაც, უსაფრთხოების საკითხებთან დაკავშირებული შეშფოთების გამო, განაახლა მოწოდება თავისი მოქალაქეებისადმი ირანის დატოვების შესახებ. იტალიის საგარეო საქმეთა სამინისტრომ აღნიშნა, რომ ამჟამად ქვეყანაში 600-მდე იტალიელი იმყოფება და მათი უმრავლესობა თეირანშია.
„რეგიონში იტალიის შეიარაღებული ძალების 900-ზე მეტი წევრი იმყოფება“, — განაცხადა სამინისტრომ და აღნიშნა, რომ მეზობელ ქვეყნებში მომსახურე პერსონალის დასაცავად პრევენციული ზომებია მიღებული.
პოლონეთმა მსგავსი გაფრთხილება გამოსცა და მოქალაქეებს ირანის დაუყოვნებლივ დატოვებისკენ მოუწოდა, ასევე ურჩია, არ იმოგზაურონ ამ ქვეყანაში. გერმანიამ კი გააფრთხილა მოქალაქეები თვითნებური დაკავების რისკის შესახებ, მოუწოდა ირანში მყოფებს დატოვონ ქვეყანა და გასცა რეკომენდაცია იქ გამგზავრებისგან თავის შეკავების შესახებ.
არაღჩიმ განაცხადა, რომ მთავრობა სიტუაციას აკონტროლებს
აშშ-ის პრეზიდენტმა დონალდ ტრამპმა ირანის წინააღმდეგ სამხედრო მოქმედებების შესახებ გააფრთხილა იმ შემთხვევაში, თუ ირანი სიკვდილით დასჯიდა ანტისამთავრობო მომიტინგეებსა და მათ ლიდერებს. ოთხშაბათს, რამდენიმედღიანი ბრალდებებისა და დაპირისპირების შემდეგ, მან განაცხადა: „ჩვენ გვითხრეს, რომ ირანში მკვლელობები სრულდება — დასრულდა — სრულდება“.
ტრამპს არ დაუკონკრეტებია, როგორი იქნებოდა აშშ-ის პასუხი, და გაურკვეველი დარჩა, ნიშნავდა თუ არა მისი განცხადებები სამხედრო მოქმედების გადადებას.
ირანი დეკემბრის ბოლოდან მოყოლებული პროტესტის ტალღამ მოიცვა, რაც ეროვნული ვალუტის მკვეთრმა გაუფასურებამ და გაუარესებულმა ეკონომიკურმა პირობებმა გამოიწვია. დემონსტრაციები თეირანის „დიდ ბაზარში“ დაიწყო და შემდეგ ბევრ ქალაქში გავრცელდა. ირანელმა მაღალჩინოსნებმა მომხდარი უცხოურ ჩარევას დაუკავშირეს და მომიტინგეები „ტერორისტული აქტების“ განხორციელებაში დაადანაშაულეს.
ოთხშაბათს მოგვიანებით, ირანის საგარეო საქმეთა მინისტრმა აბას არაღჩიმ ამერიკული ტელეკომპანია Fox News-ის გადაცემაში "Special Report" განაცხადა: „სამდღიანი ტერორისტული ოპერაციების შემდეგ ახლა სიმშვიდეა. ჩვენ სრულ კონტროლს ვფლობთ“.
