პრეზიდენტმა რეჯეფ თაიფ ერდოღანმა გლობალური თანამეგობრობას ღაზის წინააღმდეგ ისრაელის თავდასხმების დასასრულებლად და ალყაში მოქცეულ რეგიონში ჰუმანიტარული დახმარების მიწოდების უზრუნველსაყოფად დაუყოვნებლივი მოქმედებისკენ მოუწოდა. ერდოღანმა გააფრთხილა, რომ მსოფლიოს „მოთმინების ფიალა სადაცაა გასკდება“.

გაბონის პრეზიდენტთან, ბრის ოლიგი ნგემასთან ერთად გამართულ პრესკონფერენციაზე, ერდოღანმა განაცხადა: „ჩვენი პრიორიტეტია ჩვენი ღაზელი ძმებისთვის ჰუმანიტარული დახმარების მიწოდება“.

„როგორც კაცობრიობამ, ამ სისასტიკის შესაჩერებლად ჩვენ ყველაფერი უნდა გავაკეთოთ“, - დასძინა მან.

პრეზიდენტმა ერდოღანმა მკაცრად დაგმო ისრაელის თავდასხმები პალესტინელ მშვიდობიან მოსახლეობაზე, განსაკუთრებით ღაზაში იძულებითი შიმშილისა და მოსახლეობის დიდი ტანჯვის კონტექსტში.

„ვისაც მცირედი სინდისი, გულმოწყალება და ადამიანური ღირსება გააჩნია, ამ სისასტიკის ფონზე მოთმინების ფიალა სადაცაა გასკდება“, - განაცხადა მან.

„ვერავინ დარჩება ჩუმად, როდესაც უდანაშაულო ბავშვები შიმშილით იხოცებიან და სურსათის დახმარების მისაღებად შეკრებილ მშვიდობიან მოსახლეობას მიზანმიმართულად ესვრიან“, - დასძინა მან.

გლობალური ზეწოლა ისრაელზე

ერდოღანმა აღნიშნა, რომ თურქეთი უახლოეს დღეებში გააძლიერებს დიპლომატიურ ძალისხმევას, რათა გაიზარდოს ზეწოლა ისრაელის მთავრობაზე და დასრულდეს ჰუმანიტარული კატასტროფა ღაზაში.

„უახლოეს დღეებში ვიმუშავებთ, რათა ღაზაში ჰუმანიტარული კატასტროფის თავიდან აცილების მიზნით ისრაელის მთავრობაზე ზეწოლა კიდევ უფრო გაიზარდოს“, - განაცხადა მან და ხაზი გაუსვა, რომ თურქეთი მჭიდრო კოორდინაციაშია საერთაშორისო პარტნიორებთან.

ერდოღანმა კიდევ ერთხელ დაადასტურა თურქეთის სოლიდარობა პალესტინელი ხალხის მიმართ: „ჩვენს ღაზელ ძმებს კიდევ უფრო მეტად ვაგრძნობინებთ, რომ მარტო არ არიან. რეგიონში ცეცხლის დაუყოვნებლივ შეწყვეტისა და მუდმივი მშვიდობის დასამყარებლად კიდევ უფრო მეტ ძალისხმევას გამოვიჩენთ“.

ერდოღანი მიესალმა ევროპაში პალესტინის სახელმწიფოს აღიარების მზარდ მხარდაჭერას და განაცხადა, რომ თურქეთი ასეთ ნაბიჯებს „ძვირფასად და გაბედულად“ მიიჩნევს.

„ევროპიდან წამოსულ ჰუმანურ რეაქციებს ძალიან ძვირფასად მივიჩნევთ. მივესალმებით პალესტინის სახელმწიფოს აღიარებისკენ გადადგმულ ნებისმიერ ნაბიჯს“, - განაცხადა მან.

ერდოღანის განცხადებები იმ პერიოდს დაემთხვა, როდესაც ღაზა თანამედროვე ისტორიის ერთ-ერთ უმძიმეს ჰუმანიტარულ კრიზისს განიცდის. 2023 წლის 7 ოქტომბრიდან დღემდე 60 000-ზე მეტი პალესტინელი დაიღუპა; რეგიონში საკვების, წყლისა და სამედიცინო მარაგების მწვავე დეფიციტია.

საერთაშორისო თანამეგობრობის მხრიდან ცეცხლის შეწყვეტისა და ანგარიშვალდებულების მოთხოვნები იზრდება, ისრაელის წინააღმდეგ კი სისხლის სამართლის საერთაშორისო სასამართლოსა (ICC) და მართლმსაჯულების საერთაშორისო სასამართლოში (ICJ) სამართლებრივი პროცესები მიმდინარეობს.