პრეზიდენტმა ლუის აბინადერმა განაცხადა, რომ კარიბის ზღვის აუზში ნარკოტრეფიკის წინააღმდეგ მიმართული ოპერაციების მხარდაჭერის მიზნით, მისმა ქვეყანამ აშშ-ს ტერიტორიის „შეზღუდული ვადით“ გამოყენების უფლება მისცა.
აბინადერმა, ოთხშაბათს სანტო-დომინგოში ვიზიტით მყოფ აშშ-ის თავდაცვის მდივან პიტ ჰეგსეტთან ერთად გამართულ პრესკონფერენციაზე განაცხადა: „ჩვენ მივეცით აშშ-ს უფლება, შეზღუდული ვადით გამოიყენოს სან-ისიდროს ავიაბაზასა და ლას-ამერიკასის საერთაშორისო აეროპორტში არსებული გარკვეული ზონები ისეთი ლოგისტიკური ოპერაციებისთვის, როგორიცაა თვითმფრინავების გამართვა, აღჭურვილობისა და ტექნიკური პერსონალის ტრანსპორტირება.“
ეს განცხადება მოჰყვა თავდასხმების სერიას, რომლითაც პენტაგონმა კარიბის ზღვის აუზსა და აღმოსავლეთ წყნარ ოკეანეში ის გემები ამოიღო მიზანში, რომლებსაც ნარკოტრეფიკში ადანაშაულებენ; სექტემბრიდან მოყოლებული აშშ-ის ძალებმა 20-ზე მეტი იერიში მიიტანეს, რასაც, არსებული ცნობებით, სულ მცირე 83 ადამიანი ემსხვერპლა.
„მიზანი ნათელია: გავაძლიეროთ ჩვენი შეიარაღებული ძალების საჰაერო და საზღვაო დაცვის რგოლი, რითაც უზრუნველვყოფთ ნარკოტიკების შემოსვლის აღკვეთის მტკიცე გაძლიერებას და უფრო ეფექტიან დარტყმას მივაყენებთ ტრანსნაციონალურ ორგანიზებულ დანაშაულს,“ - განაცხადა აბინადერმა.
მოგვიანებით ჟურნალისტებთან საუბრისას ჰეგსეტმა აღნიშნა, რომ აშშ „ნარკოტერორისტებს“ კვალში ჩაუდგება: „ჩვენი საზღვრები, იქნება ეს დომინიკის რესპუბლიკა თუ ამერიკის შეერთებული შტატები, უსაფრთხო იქნება და ამის უზრუნველსაყოფად მოუთმენლად ველით პარტნიორებთან მუშაობას“. მან ასევე დასძინა, რომ პრეზიდენტი დონალდ ტრამპი „სერიოზულად“ უდგება იმ კონტრაბანდისტებთან ბრძოლას, რომლებსაც აშშ-ში ნარკოტიკები შეაქვთ.
