ავსტრალიის პოლიციამ განაცხადა, რომ ხუთშაბათს ახალი სამხრეთ უელსის შტატში განხორციელებული თავდასხმის შედეგად, წინასწარი მონაცემებით, სამი ადამიანი დაიღუპა, ერთი კი დაშავდა.
ახალი სამხრეთ უელსის პოლიციის ინფორმაციით, გამოძიება მას შემდეგ დაიწყო, რაც მიიღეს შეტყობინება ლეიკ კარგელიგოს რაიონში მომხდარი შეიარაღებული თავდასხმის შესახებ, რომელსაც სამი მსხვერპლი მოჰყვა.
დაახლოებით 1 500 მცხოვრებიან ქალაქ ლეიკ კარგელიგოში, ერთ-ერთ მისამართზე, სროლის შესახებ შეტყობინების საფუძველზე საგანგებო სამსახურების ჯგუფები იქნა გაგზავნილი.
პოლიციის ცნობით, ორი ქალი და ერთი მამაკაცი შემთხვევის ადგილზე გარდაიცვალა, ხოლო კიდევ ერთი მამაკაცი მძიმე, თუმცა სტაბილურ მდგომარეობაში საავადმყოფოში გადაიყვანეს.
ABC News-ის ცნობით, თავდამსხმელი კვლავ მიმალვაში იმყოფება.
პოლიციას მომხდარის მიზეზებთან დაკავშირებით ჯერჯერობით განცხადება არ გაუკეთებია.
პოლიციის განცხადებაში ნათქვამია: „მოქალაქეებს მოვუწოდებთ თავი შეიკავონ აღნიშნულ ტერიტორიაზე გადაადგილებისგან, ხოლო ადგილობრივ მოსახლეობას - დარჩნენ სახლებში“. განცხადებაში ასევე აღნიშნულია, რომ „შემთხვევის ადგილი უსაფრთხოების მიზნით შემოსაზღვრულია და დაწყებულია გამოძიება მომხდარის გარემოებების დასადგენად“.
