ოფიციალური პირების განცხადებით, ვიეტნამის ჰა ლონგის ყურეში, შაბათს ტურისტული ნავის გადაბრუნების შედეგად, რომელზეც 53 მგზავრი იმყოფებოდა, დაღუპულთა რიცხვი 34-მდე გაიზარდა.

ადგილობრივი მედიასაშუალების, VN Express-ის ინფორმაციით, რომელიც კუანგ ნინის პროვინციის ხელისუფლებაზე დაყრდნობით ავრცელებს ინფორმაციას, ტურისტული გემი სახელწოდებით Wonder Sea შაბათს შუადღისას, დაუ გოს მღვიმესთან ახლოს, ძლიერი ქარისა და უხვი ნალექის გამო გადაბრუნდა.

ოფიციალურმა პირებმა განაცხადეს, რომ ამ დროისთვის 12 ადამიანი გადაარჩინეს, ხოლო 34 ადამიანის ცხედარი იპოვეს. დაკარგული მგზავრებისა და ეკიპაჟის წევრების მოსაძებნად სამძებრო-სამაშველო ოპერაცია გრძელდება.

ცნობილია, რომ ნავზე ბავშვებიანი ოჯახებიც იმყოფებოდნენ.

გამოძიება დაიწყო

პოლიციისა და ადგილობრივი ხელისუფლების მხარდაჭერით, სამაშველო ჯგუფები სწრაფად გაემართნენ შემთხვევის ადგილზე. თუმცა, გაუარესებული ამინდის პირობებისა და შეზღუდული ხილვადობის გამო, შაბათს ღამით დაკარგულთა ძებნა შეჩერდა.

ჰა ლონგის ყურე, რომელიც ცნობილია კირქვის კლდეებითა და ბუნებრივი სილამაზით, შეტანილია იუნესკოს მსოფლიო მემკვიდრეობის სიაში და ვიეტნამის ერთ-ერთ ყველაზე პოპულარულ ტურისტულ ადგილად ითვლება.

ხელისუფლებამ დაიწყო გამოძიება შემთხვევის მიზეზების დასადგენად და გემის ოპერატორის უსაფრთხოების პროტოკოლების შესამოწმებლად.