აშშ-ის ხაზინის სამინისტრომ ქვეყნები გააფრთხილა, თავი შეიკავონ საპასუხო ზომებისგან დაძაბულობის ესკალაციის თავიდან ასაცილებლად.
აშშ-ის პრეზიდენტის, დონალდ ტრამპის მიერ გამოცხადებულ საპასუხო ტარიფებს მსოფლიოში მწვავე რეაქცია მოჰყვა. ამ ნაბიჯის საპასუხოდ, რომელიც სავაჭრო ომის შემდგომი ესკალაციის რისკს შეიცავს, აშშ-ის ხაზინის სამინისტრომ სხვა ქვეყნებს მოუწოდა, თავი შეიკავონ საპასუხო ზომებისგან.
კანადის პრემიერ-მინისტრმა მარკ კარნიმ ოთხშაბათს განაცხადა, რომ ტრამპის ტარიფებს პასუხს გასცემენ.
„ჩვენი მიზანია მკაფიო და მტკიცე ნაბიჯის გადადგმა. ჩვენ ამას გავაკეთებთ,“ - თქვა მან და დასძინა, რომ მინისტრთა კაბინეტის სხდომის წინ კანადის საპასუხო ნაბიჯებს განიხილავენ.
მექსიკის პრეზიდენტმა კლაუდია შეინბაუმმა კი განაცხადა, რომ დაელოდება, თუ როგორ იმოქმედებს ტრამპის განცხადება მის ქვეყანაზე, თუმცა ხაზი გაუსვა, რომ მათი მთავარი მიზანი მექსიკის ეკონომიკის გაძლიერებაა.
„ეს არ არის საკითხი „შენ თუ გადასახადს დამიწესებ, მეც დაგიწესებ“, - თქვა შეინბაუმმა და აღნიშნა, რომ ისინი საკუთარ ეკონომიკურ ინტერესებს ანიჭებენ უპირატესობას.
ჩინეთმა კი ღიად გამოხატა წინააღმდეგობა ტრამპის ფართომასშტაბიანი ტარიფების მიმართ და განაცხადა, რომ „საკუთარი ლეგიტიმური უფლებების დასაცავად საპასუხო ზომებს მიიღებს“. ჩინეთის ვაჭრობის სამინისტრომ განაცხადა, რომ აღნიშნული ტარიფები ეწინააღმდეგება საერთაშორისო სავაჭრო წესებს და საფრთხეს უქმნის გლობალურ ეკონომიკურ განვითარებას.
განცხადებაში ნათქვამია: „აშშ-მა დაუყოვნებლივ უნდა შეწყვიტოს ეს ცალმხრივი მბრძანებლური პრაქტიკა“.
ბრაზილიის პარლამენტმა კი დაამტკიცა კანონი, რომელიც აღმასრულებელ ხელისუფლებას სავაჭრო ბარიერებზე რეაგირების უფლებამოსილებას ანიჭებს. მთავრობამ აშშ-ის მიერ მოყვანილი „ორმხრივობის“ არგუმენტი „რეალობასთან შეუსაბამოდ“ შეაფასა.
ტრამპთან დაახლოებულად ცნობილმა იტალიის პრემიერ-მინისტრმა ჯორჯა მელონიმ კი განაცხადა, რომ ტარიფები არასწორია:
„ეს პრაქტიკა აშშ-სთვის სასარგებლო არ იქნება. ჩვენ ყველაფერს გავაკეთებთ, რათა ვიპოვოთ შეთანხმების საფუძველი აშშ-სთან სავაჭრო ომის თავიდან ასაცილებლად,“ - თქვა მან. მელონიმ ასევე აღნიშნა, რომ იტალიის ინტერესებიდან გამომდინარე, ევროპელ პარტნიორებთანაც იქნებიან კონტაქტზე.
სამხრეთ კორეის დროებითმა პრეზიდენტმა ჰან დოკ სუმ კი მრეწველობის სამინისტროს დაავალა, ვაშინგტონთან აქტიური მოლაპარაკებები აწარმოოს ტარიფების გავლენის შესამცირებლად.
აშშ-ის ხაზინის მდივანმა სკოტ ბესენტმა Fox News-თან ინტერვიუში განაცხადა, რომ ქვეყნებმა არ უნდა მიმართონ საპასუხო ზომებს, რადგან ეს ახალ ესკალაციას გამოიწვევს.
„უსამართლო, უკანონო, დაუსაბუთებელი“
ევროპარლამენტის საერთაშორისო ვაჭრობის კომიტეტის თავმჯდომარემ ბერნდ ლანგემ მკაცრად გააკრიტიკა ტრამპის მიერ ევროკავშირიდან იმპორტირებულ პროდუქციაზე 20%-იანი საბაჟო გადასახადის დაწესება:
„ტრამპმა შეიძლება ამას „განთავისუფლების დღე“ უწოდოს, მაგრამ რიგითი მოქალაქისთვის ეს „ინფლაციის დღეა“, - თქვა მან და ხაზგასმით აღნიშნა, რომ ეს არაპროპორციული ზომები მხოლოდ ახალ საგადასახადო სპირალს გამოიწვევს.
იაპონიის ვაჭრობის მინისტრმა იოჯი მუტომ ასევე განაცხადა, რომ აშშ-ის მიერ იაპონიიდან იმპორტზე დაწესებული 24%-იანი გადასახადი „უკიდურესად სამწუხაროა“ და ვაშინგტონს ამ პრაქტიკაზე უარის თქმისკენ მოუწოდა.
ავსტრალიის პრემიერ-მინისტრმა ენტონი ალბანიზმა კი განაცხადა, რომ მის ქვეყანაზე დაწესებული ტარიფები სრულიად უსამართლოა.
„ტრამპი ორმხრივობაზე საუბრობს. რეალური ორმხრივი ტარიფი ნულია და არა 10 პროცენტი,“ - თქვა ალბანიზმა და დასძინა, რომ ავსტრალია ამის მიუხედავად საპასუხო ზომებს არ განიხილავს.
ინდოეთში გამართულ ბიზნეს ფორუმზე სიტყვით გამოსვლისას, ჩილეს პრეზიდენტმა გაბრიელ ბორიჩმა თქვა, რომ მსგავსი ზომები ქმნის გაურკვევლობას და არღვევს საერთაშორისო ვაჭრობის მარეგულირებელ პრინციპებს.
„შეინარჩუნეთ სიმშვიდე“ - მოწოდება
ზოგიერთმა ქვეყანამ კი ტრამპის ტარიფების მიმართ უფრო ფრთხილი მიდგომა არჩია.
გაერთიანებული სამეფო იმედოვნებს, რომ აშშ-სთან გასაფორმებელი ეკონომიკური შეთანხმება შეამსუბუქებს 10%-იანი საბაჟო გადასახადის გავლენას. ვაჭრობის მინისტრმა ჯონათან რეინოლდსმა თქვა: „ჩვენ სიმშვიდესა და სიმტკიცეს შევინარჩუნებთ“.
გერმანიის ქიმიური მრეწველობის ასოციაციამ კი ევროკავშირს „სიმშვიდის შენარჩუნებისკენ“ მოუწოდა და განაცხადა, რომ ესკალაციური სავაჭრო ომი ევროპის ეკონომიკას დააზარალებს. განცხადებაში ნათქვამია: „გერმანია არ უნდა გახდეს სავაჭრო ომის პაიკი“.
ახალი ზელანდიის ვაჭრობის მინისტრმა ტოდ მაკკლეიმ ასევე გააპროტესტა აშშ-ის ტარიფები და თქვა, რომ ნახსენები საგადასახადო განაკვეთები რეალობას არ შეესაბამება.
„ჩვენ ვართ ქვეყანა, რომელიც ძალიან დაბალ ტარიფებს იყენებს. არა 20 პროცენტს, არამედ აშშ-ის მიერ ნავარაუდევი 10 პროცენტზე ნაკლებსაც კი,“ - თქვა მაკკლეიმ და ხაზი გაუსვა, რომ საპასუხო ზომები ქვეყნის შიგნით ფასებს გაზრდის და ინფლაციას გამოიწვევს.
